Šudiņ, 7. decembrī 18:00 Rēzeknis piļsātys Kulturys nomā tiks atkluota izstuode “Viesturiskī cymdi i zečis”.

Latvīšu cymdi i zečis ir unikala boguoteiba rokstu daudzveideibā, kruosu salykumā i pīlītuojumā. Cymdi i zečis vysu spylgtuok izsoka latviskū gaumi, radūšū prīcu i izdūmu, omota prasmi i latviskū pasauļa iztveri. Laiks I kūdis nažāloj pot vyssmolkuokūs adejumus i rokstus, ari čokluos adreituojis jau ir cīnejamā vacumā. TLMS “Dzīpariņš” kolektivā roduos ideja apzynuot i apgiut zeču i cymdu adeišonys tradiceju prasmi Latgolā, sasateikūt ar pīredzejušim cymdu i zeču adeituojim i adeituojom.

Cymdi ir vīna nu eipatnejuokom i skaistuokom latbviskuos identitatis izpausmem, kas turpynoj sasaglobuot ar myusdīnuos. Rēzeknis Dzīšmu svātku bīdreiba sadarbeibā ar Rēzeknis piļsātys Kulturys noma TLMS “Dzīpariņš” realizeja projektu “Viesturiskī cymdi i zečis”. Projekts tyka realizeits ar Rēzeknis piļsātys dūmis Kulturys puorvaļdis Mozū kulturys projektu atbolstu.

Eistynojūt itū projektu, tika atjaunuoti i papyldynuoti Latgolys Kulturviesturis muzeja viesturiskūs i Latgolai rakstureigūs cymdu i zeču kruojumi – cymdi i zečis tyks nūdūti muzeja globuošonai. Izpātūt latgaliskūs kruosu i rokstu salykumus, tyka adeiti myusdīneiga stila cymdi i zečis, kas nūteikti rūsynuos interesi par itū rūkdorbu veidu jaunīšu vydā. Pasasokūt TLMS “Dzīpariņš” prasmeigajom, izdūmys i pīredzis boguotajom dalineicom, kurys voda Anita Kairiša, Latglys kulturys namaterialais montuojums – omota prasmis – tiks nūdūts jaunajai paaudzei, kas nūdrūšynuos tuo turpmuokū dzeivuotspieju.

Pasuocīnī pīsadaleis folklorys kūpa “Rūta”, varēs apgiut odotys pynuma tehniku (pyrmuo adeišonys tehnika) I darynuot cymdus I zečis itymā tehnikā Vēsmys Ušpelis meistardorbneicā.

Īeja pasuocīni bez moksys.

Informaceju sagataveja:  Rēzeknis piļsātys Kulturys noma metodike Rūta Legnere

Karteņa: nu Rēzeknis piļsātys Kulturys noma arhiva

Atslāgvuordi: cymdi, Latgolys omotnīki, Rēzekne, TLMS Dzīpariņš, zečis