Idealais latgalīts i latgalīte? Kaids jis/jei ir?
27. Janvars, 2012 gods | Autors: admin | Cylvāki, Dīnroksti, Latgolys Studentu centrs Tags: eipašeibys, Idealais latgalīts, idealuo latgalīte, LgSC21. janvarī Rēzeknē nūtyka bīdreibys „Latgolys Studentu centrs” kūpsapuļce. Vīna nu aktivitatem piec atskaitem, vieliešonom i jauna godu planu sprīsšonu, beja „Pasauļa kopejneicys” principa diskuseju grupys, kuruos tyka daleita pīredze i pasasmalts jaunu ideju.
Vīnā nu kopejneicys sarunu grupom tyka vaicuots: kaids tovupruot ir idealais latgalīts i latgalīte? Apkūpojūt LgSC bīdru saceitū i raksteitū, saīt:
Ideals (daudzfunkcionals) latgalīts ir:
• apzineigs, runuoteigs (atsoka iz bīdru e-postim);
• daudzi dūmoj i daudzi dora;
• struodoj ar golvu i ir inovativs (vysa kū jaunu izdūmoj);
• var tuoli aizīt i pa snīgu staiguļuot (lelys kuojis);
• videi i sīvītem draudzeigs;
• mugurkauls nu tārauda (nabāg nu sīvys);
• prūt vuoreit studini i suoleit ogūrčus;
• soka „nā!” kārdynojumim (tik na sīvīšu);
• mierķtīceigs;
• elasteigs (soka: paļdis, lyudzu, ka vajag var pasceit ari: ej dierst);
• zyna IT, izmontoj latgalīšu volūdu škārsteiklā;
• lelys smadzinis i spieceigys rūkys;
• atbiļdeigs i jautrs (obi leidzsvorā).
Ideala buoba, buobeņa, latgalīte:
• vyss tys pat, kas latgalīts +
• žūgvuovere (piec vajadzeibys haotiska byutne, kas nalaiž montu zyudeibā);
• lobim pīduovojumim vysod atvārta (lobim pīduovojumim!);
• sportiste, „komsamolka” i šmuka buobeņa;
• jū var īkārdynuot ar bīzim kuopustim (korstym nu plitys);
• prūt nūvierteit cylvākus;
• ar garim motim i lelu kryutežu.
Myusūs kotrā ir koč kas nu idealūs latgalīšu… Prūtam byut struodeigi i nūpītni, piec dorba ari pasaļusteit, pastuosteit jūkus, kūpā pasasmīt.
Kaidom eipašeibom i parametri piec Tovu dūmu vēļ byutu juopīmeit idealam latgalīšam i latgalītei?
Atslāgvuordi: eipašeibys, Idealais latgalīts, idealuo latgalīte, LgSC
Vīneigi žāl, ka vairums aktivuokū LgSC bīdru dzeivoj Reigā. Tys nūzeimei, ka bīdreibys bīdrim ir lelys problemys ar patriotismu.
Ideals latgalīts ir tys, kurš dzeivoj Latgolā – kuortejū reizi atguodynoju, ka latgalīts ir teritorials jeidzīns, bet latgaļs ir etnisks.
Sovkuort ideals latgaļs ir tys, kurš naatzasoka nu sovom saknem i sova tyukstūts godus vacuo etnosa, volūdys, tradicejom, kulturys, zemis.
Nu kura laika aktivitate i dzeivuošona Reigā ir grāks? Maņ ruodīs, ka tai ir lobuok, na kai dzeivuot Latgolā i čeikstēt, ka vyss švaki i gaideit nazkaidus breinumus. Tik munys dūmys. Prūtama līta, breineigi, ka var dzeivuot iz vītys i byut aktivam, nu patriotismam ar tū nav nikaida sakara. Maņ pošai Reiga dūd vaira īspieju byut latgaliskai nakai daudzys vītys Latgolā. Nu vīnys pusis skumi, nu ūtrys – fakts.
Mes pasi veidojam cik lila ir LAtgale! na tikai TEritoreja bet aridzan gareigo i duumojuso Latgale…
Nazynu voi tys ir grāks, bet dzeivuošona uorpus sovys zemis gūdu gon nadora. Dīvs latgalim devs sovu zomi – a jī nū tuos atzasoka, aizbāg, atstuoj nūvuortā voi puordūd.
Patriotisms ir sovys tāvzemis meilisteiba. Zemi juomeil ari ar mīsu, na tikai goreigi nu vaira kai 200km attuoluma. Leidzeigs patriotisms ir krīvim, kuri blauņ cik jim meila i duorga Krīveja, bet kod teik pīduovuots braukt atpakaļ iz Krīveju, tod grybātuoju nav! Tamā mirklī leluoka olga, demokrateja, eiropisms, komports i dorbs ir svareiguoki par patriotismu. Švaki, ka daži spiejeigi byut “patrioti” tikai nū lela gobola!
Kas nūtiks, ja vysi latgali saleiss Reigā i Latgola paliks tukša? Latgaļu kultūra var eksistēt tikai i vīneigi Latgolā – juos dabiskajā vidē. Reiga dēl latgalim nav dabiska vide. Ja Latgolā sazamazynoj latgaliski runojūšū skaits – tod kaida gon var byut runa par tū, ka latgaļu volūdai vajag statusu? Ja Latgolā nabyus latgaļu – voi byus vajadzeiga latgaliska radeja? Latgaliska TV? Avīzis?
Ar biegšonu iz Reigu i iz vītom, kur ir dorbs i leluoka olga – latgali sovu zemi atdūt krīvim. Juoceinās navys juodezertej nu kaujis lauka.
Edeit! Kaida ir LgSC devīze? Latgolu saulē celt? Dzeivojūt Reigā saulē var īcelt tikai Reigu, bet ni Latgolu! Latgolā ir cīši daudz dorba, bet trykst iz vītys dareituoju – nav cylvāku.
Vysi gudri nu molys pavuiceit, bet cik pots esit Latgolys lobā padareijs? Naz kai nadzieržu par Jyusu dorbim.
I nav Jums nikaidu tīseibu pateikt, ka tī kas ir Reigā nav latgalīši i ir nudevieji. Asu i byušu latgalīte Riezeknē, Reigā, Londonā ci Bangladešā.
Muns radzamuokīs dorbs ir vīsneica “Latgola” Daugavpilī.
Asu cīši rodūšis propesejis puorstuovs. Dīmžāl daudzi napareizi uzskota, ka Latgolys lobā struodoj tikai ailinīki, rakstnīki, muzikanti i 2 Saeimys deputati. Struodoj ari cyti – tik jī nav pazeistami i atpazeistami. Ir daudz klusū dareituoju.
Maņ ir tīseibys saceit patīsebu – daudzi Reigā dzeivojūši latgalīši (gon latgali, latvīšī, krīvi, ukraini, boltkrīvi) ir nūdevieji, kuri sovus spākus atdūd cytu lobkluojeibys ceļšonai.
Jums tīšom nikod naapneik meklēt inaudnīkus, daže starp latgalīšim.
Ja Jums tai vīglok, tod dzeivoji ar puorlīceibu, ka vysi uorpus Latgolys ir nudevieji.
Marek tu ibrauci auzois, Nav nuzeimis kur latgals dzeivoj. As pa pusei dzeivoju reigā Ku tys dūt dzeivoit tikai Latgola ka tūs kas dzeivoj Latgola pilneigi apmirynoj situaceja ka jūs bārbin ar varu uzspīž muocetis latvīšu volūdu, jī naprosa latgaliskys avizis radio televizeji ar bārnim i iz īlys vasalom gimenjom volkojās pa Rezekni Daugavpili ruonoj drausmeigā valsts volūda Vysu cīnu ,,Sovvalnīkam,, kurš ar sovu muzyku cel Latgolu augšā, bet kai jys runoi čyuliski gar zemi juokreit . Nu runoj Tu latgaliski, i byus priks klausetis Tovys intervejis. Priks kam latgalisam juorunoj ctyliski ? Mes vīns utru saprutom. Nu suoks cyuls runoit latgaliski ? Nu smikla juokreit gar zemi, taipat kod dzierd intervejis kur pogosta ,,kranis,, i vechi lauzois koc kaida zargonā. Runoite kotrs sova voluda i saprutit vins utru.
As uzskotu ka Reiga vairoik latgalu na kai Latgola. I nemit nu mani pimaaru runoite Reiga Latgalu voluuda i Reiga reit byus latgaliska. Cyuli jau sen izmyruši palykuši tik latgalisi kuri narunoj latgaliski
Pīkreitu Arvidam, ka Reigā dzeivoj vaira latgaļu kai Latgolā. Viņ latgali nikai naizīt nu Atmūdys stadejis – t. i., vysu laiku nūteik latgaliskuo revoļuceja, bet jei nasainstitucionalizej, napuoraug par stabilu sistemu ar gona lelu skaitu kasdīnā struodojūšu instituceju i skaidrai sadaleitom funkcejom. A revoļucejis, nacionaluos atmūdys stadejā tys normalai, ka centrys var i nabyut taišni pošā viesturiskajā teritorejā.
AK! Ja vysi latgali puorzacelsīs iz trimdu i byus revolūcejis virzeituoji, idejiskī tāvi i vodūni – kas paliks Latgolā i kūps latgaļu zemi? Krīvi, boltkrīvi, poļaki…?
Reigā ir vaira latgaļu kai Latgolā, tikai Reigys latgali ir latgali pēc ašnim, bet na pēc kulturys i dzeivis veida. Muns bruoļs i divejis muosys dzeivoj Reigā – pēc ašnim jī ir latgali, bet ikdīnā latgalu volūda i kultura jim pilneigi navajadzeiga i mozsvareiga. Munim klasisbīdrim – latgalim arī tys pats, ka jī pēc ašnim latgali, bet ikdīnā dzeivoj kai baltīši, latgaliski narunoj i par latgaliskumu nadūmoj i nazaceinās.
Taipat pagaidom eistuo i dzeivuo latgaļu tautys kultura ir Latgolā! Reigys latgali nikuo vierteiga nav radiejuši – ja naskaita puors gruomotys. Latgaļu teatris, keramika, muzika, ailis, stuosti – pagaidom vēl tūp Latgolā.
Patīseibā Reiga ir vīns lels “tautu kotls”. Latgali tamā kotlā izavuora par baltīšim voi krīvim. Kotru godu Reigā īplyust vairuoki symti latgaļu, bet jī koč kai uotri sovu latgaliskumu zaudej – Reigā nav latgalu školu, latgaļu radejis, latgaļu TV, latgaļu teatra. Reigā latgaļu lobā koč kū dora LgSC, “Trešuo zvaigzne”, Arvids, vēl 5-10 cylvāki i tys ir vyss!
Kū latgaliskuma lobā dora puorejī 200 000 Reigā dzeivojūšū latgaļu?? Niko – runoj baltiski i sorgoj Reigu nu puorzakrīvuošonuos!
LgSC zeimojās iz studentim, a “Trešajā zvaigznē” pa lelumam tī, kurim piec 50.
Kur Reigā īt tim latgalim, kuru vacums nu 25 da 50 i kuri ekonomiskai vysuaktivuokī? Latgaļu krūgs? Latgaļu biznesa palata? Taidi irā?
Latgolā dzeivoj stypri ļauds, kuri var iztvert bez regulara ļaudyskuo transporta, bez gluda asfalta i leidzeigys myuslaiceigys infrastrukturys, ar minimalu atspaidu nu vaļsteibys pusis. Na vysi taidi stypri, partū na vysi var palikt Latgolā.