Kai LaKuGa sovulaik raksteja, ituo goda janvara pādejuos dīnuos Latvejis Universitatis Literaturys, folklorys i muokslys instituts (www.lfmi.lu.lv) izdevs Aigara Lelbuorža i Mārteņa Boiko kruojumu “Psalmu dziedāšana Latgalē”.

19. martā 13:00 Viļakys bibliotekā Viļakys nūvodā i 11. aprelī 16:00 Jāzepa Vītola Latvejis Muzykys akademejā Reigā nūtiks saļmu dzīduošonys kruojuma atdareišonys svātki, iz kurim meili aicynuots ir sevkurs iņteresents.

Kruojumā vīnūs vuokūs īlykta gruomateņa ar tekstim latvyski i angliski, DVD ar 2009. goda saļmu dzīduošonys īrokstu Rekovā i vasali trejs CD ar saļmu dzīduojumim Upeitē, Kruoslovā, Saļņovā, Viļakā, Žīgurūs, Dagdā i Murmastīnē (1971-2009). Kruojums ir zynuotnisks izdavums ar komentarim par saļmu dzīduošonys tradiceju Latgolā i dzīduojumu īrokstim audio i video. Vaira par kruojumu skaiti ITE.