Turpynojās projekta „Virtualuo paguotne – muzeja nuokūtne” realiziešona

Turpynojās projekta „Virtualuo paguotne – muzeja nuokūtne” realiziešona

Rēzeknis Augstškola sadarbeibā ar partnerim nu Lītovys, Boltkrīvejis i Latgolys Kulturviesturis muzeja eistynoj puorrūbežu projektu „Virtualuo paguotne – muzeja nuokūtne”.

Latvejis–Lītovys–Boltkrīvejis puorrūbežu projekts „Virtualuo paguotne – muzeja nuokūtne” teik eistynuots nu 2012. goda 1. decembra. Projektā golvonais partners ir Rēzeknis Augstškola, īsaisteitī partneri: Kedaiņu Regionalais muzejs (Lītova), Maksima Bogdanoviča muzejs (Grodņa, Boltkrīveja) i Rēzeknis piļsātys dūme, kurū puorstuov Latgolys Kulturviesturis muzejs.  Projekta mierkis – izveiduot virtualys muzeju fondu galerejis, kurys byutu pīeimamys škārsteiklā, taidā veidā modernizejūt muzeja eksponatu apsavieršonu, pīduovojūt interektivus elementus i īinteresejūt dažaidys vacuma grupys, bet eipaši jaunīšus, apmeklēt muzejus arī  kluotīnē. Projekta ilgtermeņa mierkis – sataiseit vīnuotu datu bazi (virtualu vītni) sovulaik viesturiski saisteitim nūvodim Lītovā, Boltkrīvejā, ari Krīvejā i Pūlejā, īpazeistūt kulturu i volūdu leidzeibys, meklejūt jaunys sadarbeibys idejis kulturys i tautsaimnīceibys atteisteibys laukā.

Latgolys keramikai ir senejis tradicejis, i Latgolys kulturviesturis muzejā ir godu desmitim taiseita unikala keramikys darynuojumu kolekceja. Pasateicūt itam projektam, ari daudzim cylvākim cytur pasaulī ar škārsteikla paleidzeibu byus īspieja apsavērt gon Latgolai rakstureiguos tradicionaluos skrūzis, gon malnuos keramikys vazys, gon svečturus i ari modernā stylā taiseitus izstruoduojumus.

Kūpejuo projektu izdavumu summa – 374,832,33 eiro, nu tim 90% – Eiropys Savīneibys finansiejums. Projekta eistynuošonys laiks ir 24 mieneši. Der atguodynuot, ka kūpumā ūtrajam puorrūbežu projekta konkursam tyka īsnīgti 162 projektu pīteikumi, atbaļsteiti – 27 projekti, nu tim 10 projektu īsnīdzieji nu Latgolys regiona.

Programa aptver Latgolys regionu Latvejā, Panevežys, Utenys, Viļnis, Alitys i Kaunis apgobolus Lītovā, kai ari Vitebskys, Mogilevys, Minskys i Grodnis apgobolus Boltkrīvejā. Kai programys kūpeiguo vadeibys īstuode dorbojās Lītovys Republikys Īšklītu ministreja.

Programys oficialuo sātys lopa ir www.enpi-cbc.eu.

Ingars Gusāns, projekta vadeituojs

Print Friendly, PDF & Email