Rokstu sagataveja: portals lakuga.lv

Jau ostoitū reizi Latgalīšu kulturys goda bolvā “Boņuks” tyka nūskaidruoti i publikys simpateju bolvys “Žyks” uzvarātuoji. Bolsuošonā, kū organizēja latgalīšu kulturys ziņu portals lakuga.lv i Latvejis Sabīdryskuo medeja portals LSM.lv, itūgod vysuvaira bolsu sajēme i “Žyka” statueti svineigajā ceremonejā 14. martā Latgolys viestnīceibā “Gors” dabuoja grupys “Bruoli i Muosys” albums “Na pādejais” Itei ir vīna nu ratūs reižu, kod “Žyka” sajiemiejs tyka ari pi pošys “Boņuka” bolvys.

Grupys “Bruoli i Muosys” albums “Na pādejais” beja vīns nu 30 Latgalīšu kulturys goda bolvys “Boņuks 2025” nominantu i atbaļsteit sovu simpateju kotrys grybātuojs portalā LSM.lv varēja nu 2. da 11. marta. “Žyka” bolvys sajiemiejs – grupys “Bruoli i Muosys” albums “Na pādejais” – ir jūs debejis īroksts, Latgolys jaunūs muziku radeits etnodžezs latgaliski. Albuma nūsaukums ir muojīņs – itys nav pādejais, tok tys ir pyrmais. “Bruoli i Muosys” sevī nas na tik spieju atskaņuot voi aranžēt, tok radeit jaunu volūdu – myusdīneigu, pošcīna pylnu, skaneigu Latgolu. Jūs repertuarā skaņ i originaldorbi, i tradiceja, kas nav muzeja eksponats, bet dzeivs, plyustūšs spāks, kū papyldynoj sovu sakņu apsazynuošona i dziļa pīsaiste Latgolai. Interveju ar grupu var puorskaiteit ITE, bet albuma recenzeju – ITE.

Bolsuojuma uzvarātuojs tyka pi keramikis Vēsmys Ušpelis taiseituos muola statuetis “Žyka”, kurā radzams Boņuka suņs Žyks, kurs ari sovulaik plašuok tyka īpazeits caur režisora Juoņa Streiča kinu “Cilvāka bērns”, kas baļsteita taida poša nūsaukuma rakstnīka Juoņa Klīdzieja romanā. Statueti i eipašu sveicīni nu latgalīšu kulturys kusteibys “Volūda” i latgalīšu kulturys ziņu portala lakuga.lv – latgalīšu literaturys i Latgolā taiseitūs lobumu kasti – bolvys ceremonejā raidejumu cykla autorim pasnēdze portala lakuga.lv vadeituoja Amanda Anusāne i LSM Latgolys redakcejis vadeituoja Madara Bērtiņa.

Itei beja vīna nu ratūs reižu, kod “Žyka” sajiemiejs tyka ari par “Boņuka” laureatu – grupa “Bruoli i Muosys” atzineigai tyka nūvārtāti kai sabīdreibys, tai žurejis viertiejumā. Publikys simpateju bolvu “Žyks” da ituo sajiems raidejumu cyklys “Pazudušū pādu retrospekceja”, Baļtinovys amaterteatris “Palādas”, treis reizis rūkdarbneica, tautystārpu entuziaste i “Latgolys etnografiskuos viestnīceibys” vadeituoja Iveta Seimanova, taipat bolva tykuse ari folklorys kūpys “Upīte” i īrokstu studejis “Bigmaar’s Records” rūkuos. Vīneigī, kas vēļ reizē tykuši kai pi “Žyka”, tai “Boņuka”, ir folklorys kūpa “Upīte”.

Publikys bolsuojuma bolvys “Žyks” mierkis ir dagrīzt vēļ leluoku sabīdreibys viereibu pārnejā godā latgalīšu kulturā padareitajam i “Boņuka” nominantim. Ka latgalīšu kulturys goda bolvys “Boņuks” laureatus nūsoka žurejis bolsuojums, tod “Žyka” uzvarātuoju gūds ir publikys aktivitatis rūkuos.

Latgalīšu kulturys goda bolvys “Boņuks 2025” ceremoneju vēļreiz var nūsavērt ITE.