Ir laiks, kod ļauds jiut Vaļsts svātku nūskaņuos i pat sabīdriskais transports izrūtuos ar sorkon-bolt-sorkonajim karūdzenim, i Daugovpilī jau aiz laika sadagtys Zīmyssvātkim atbylstūšys gaismu virtenis pi 18.novembra īlys laternom… 16. oktobrī „Latgolys Studentu centra” Daugovpiļs birojs aicynuoja iz tematiskū vokoru „Latvija – Latgola: es asu tu – tu esi es”, kurš veļteits Latvejis Vaļsts svātkim. Latgola ir naatjamama Latvejis sastuovdaļa, deļ tuo vīna nu pasuokuma temom beja par latgalīšim, kuri, dorbuojūtīs dažaiduos sferuos, ir givuši atzineibu pasauļa mārūgā, bet nareti ir damiersti sovā dzymtajā pusē. Par ļaudim, kuri pagaidom nav pīmynāti školu vuiceibu materialūs, bet ir nasuši gon Latgolys, gon Latvejis vuordu pasaulē. Pi īsapazeišonys jaunīši stuoseja par vītom, nu kurīnis cālušīs – Kolupis, Maltys, Pušys, Rēzeknis, Preilim, Sokolovys, Rogovkys, Gaigalovys – , par īvārojamim cylvākim i apskatis objektim, kas ir daļa nu Latvejis.

Turpynuojom ar diskuseju par Latgolys ļaužu unikalitati i tū, kai jei papyldynoj Latveju. Plašuokys diskusejis izraiseja dūma, ka latgalīši grib saglobuot sovu identitati. Studenti atzyna, ka nūzeimeiga tuos sastuovdaļa ir volūda i juos saglobuošona. Latgalīšu mēlē teik runuots saimē, ar draugim, rodim, paziņom, skaiteiti roksti internetā i vītejā presē, ailis Susātivē i lyugšonys puotoru gruomotā, teik raksteitys eiszinis i viestulis sovejim. Latgalīši ir eipaši ar tū, ka prūt uzjimt gostus (bet vysaiž var saīt ar latvīša – latgalīša sajaukumim, kuri asūt vysbeistamuokī, partū ka nu vīnys pusis lobi, bet vydā var byut vysaiži ), svieteit svātkus, īt iz balim, īvāruot tradicejis.

Dažaida pīredze atsakluoja, kod tyka uzdūts vaicuojums – latgaliskais paleidz voi traucej? Izaruoda, cik ļaužu, tik vīdūkļu, kuri baļsteiti iz dažaidu pīredzi. Bet apšaubeit, ka latgaliskais ir pīvīnuotuo vierteiba i papyldu bonuss, kod izadevs labi i kvalitativi padareit kaidu dorbu, nivīns nasajēme.

Daudz laimis i boltu dīnu Latvejai i myusim vysim!