Rokmuzykants Sovvaļnīks ruodeis sovu jaunuokū muzykys video, tymā ar osa sižeta kinys cīneigim leizeklim paruodeita vīna attīceibu variaceja myusu sabīdreibā. Kasdīnā ar tū sasaskar gondreiž visi, kas sasaglobuojuši sovā identitatē (pīvadumam, paturiejušs latgaliskū). Ir vaicuojums – nūglobuot tū sevī voi ari ik pa šaļtei byut pakļautam varbyutiejim īvainuojumim. „Uzbrukumi” īt nu tuos sabīdreibys dalis, kas voi nu nycynoj latgaliskū, nasaprūt tuo ci skaita tū par koč kū mozuok vierteigu. Video klipa pirmizruode paradzata ceturtdin, 3. martā pl.15:00.

Muzykys video dzīsmei „Nikas nav najaušs” nu albuma „Bolts susātivs” ir trešais Sovvaļnīka klips. Ideja par tū roduos tiuleņ piec debejis muzykys video „Vysi vieji” sataiseišonys. „Vysi vieji” fiļmiešonys gaitā īsaisteitajim saguojs sajust, kū nūzeimoj „byut latgalīšam”, ka rodušuos itaidys idejis nuokamajam video – šuovīni i uzbrukumi „latgalīšam” jaunajā klipā. 2010.goda beiguos tyka suokta „Nikas nav najaušs” fiļmiešona. Tyka izmontuoti eisti īrūči i fiļmeišonys grupa dorba procesa laikā struoduoja aizsorgbrillēs. Patronu čauleitis spruoga iz vysom pusem , naratai tuos truopeja operatora kamerai.

„Maņ šod tod puormat – deļkuo tu navari nūfiļmēt vīnkuorši foršu balleiti kaidai foršai dzīsmei… Deļkuo izvēle taišni itaida?! Cīši svareigi – Ingars ir pilneigi puorlīcynuots par tū, kū jis dora, jam ir sova styngra vizeja. Ingars ir puorjimts ar latgalīšu volūdu, jis ir puorjimts ar Latgolu, ar ideju. Citi sovukuort nūlīdz sovu latgaliskū izaceļšonu. Roduos dūma, ka varātu vizuali iz ekrana puornest myusu sabīdreibys attīksmi pret latgaliskū, pret Latgolu, tuos kulturu, volūdu i latgalīšim – īvainuot, aizskart ci ari nūlīgt, ka pats esi ar dzymtys saknem pīsaisteits Latgolai. Asu diskutejs ar tim, kas globoj sovu izaceļšonu. Pīmiņu epizodi ar kaidu nu munim kolegim Reigā. Tys nūtyka breivdīnā, kod jis dorba vītā atsaroda kūpā ar kaidu sev labi pazeistamu cylvāku, obi sasarunuoja latgaliski. Telpā īguoju es, i runuotuoji samulsa… Kolegis na viņ nasceja, nu kurys pusis īt, bet pat sasabeida i samulsa par tū, ka runuojs latgaliski. Deļkuo tai?! Kai tu vari sovu dzimtini nūlīgt?! Kai var atraut dali nu myusu vaļsts?!” tai soka režisors Ingus Amatnieks.

Ar pajiemīnim, kaidim īrosts attāluot nūtykumus trillerī, ruodeits sabīdreibys separatisms, „teiri” latviskuos dalis attīksme pret latgaliskū. „Nikas nav najaušs” centralais tāls – „latgalīts” (Sovvaļnīks) sasateik ar dažaidu sabīdreibys sluoņu puorstuovim, kuri gryb izneicynuot stuosta golvonū varūni. Sovvaļnīks sajam šuovīņus vysnagaideituokojuos situacejuos. Puornastā nūzeimē – tai teik īvainuoti cylvāki, kas naslēp sovu latgaliskū identitati, i vysi, kas rauga pīruodeit, ka latvīšam var byut div identitatis – latviskuo i latgaliskuo reizē. Myusim sūpluok dzeivoj ari tī, kas nūlīdz sevī itū ūtru identitati i rauga afišēt tik latviskū. Tei ir kai fiziska ceiņa, ar īrūčim i apšaudem. Ka ir šuovīni, var sekuot ari nuoveigi īvainuojumi i … Nuove. Itymā „eisfilmā” tū attāloj skaista sīvīte – Nuovis Engeļs. Jei izstuoda sovus nūsacejumus. Kaidā epizodē pi Sovvaļnīka denenim teik dalykts pistuolis stūbrs…

Itū muzykys video, taipat kai īprīškejūs, taisejuse studeja „13 mm” režisora Ingus Amatnīka vadeibā. Jis nūlīdz, ka, verūtīs video, varātu rastīs ari pavysam cytys asociacejis, nakai īcerejušs tuo taiseituoji. Dzīsmis vuordu autors ir ailinīks Ontons Kūkuojs, kura atcerei veļteits Sovvaļnīka ūtrais albums.

Video klipa pirmizruode paradzata muzykanta sadaļā portalā draugim.lv ceturtdin, 3. martā pl.15:00 – eisu īskotu par klipa stilu var apsavērt jau tagad portalā delfi.lv.

Cyts video klips “Vosoruošonai” apbolvuots ar Latgalīšu kulturys goda bolvu “Boņuks 2010” kai lobuokais muzykys video, bet dzīsmei “Īt muna tauta” – goda dzīsmes tituls.