Beidzīs Latvejis hokeja komentietuoju konkurss, kurā pīsadaleja vaira kai 50 dalinīku. Divi lobuokī komentietuoji sajēme  nu konkursa sponsora īspieju braukt iz pasauļa hokeja čempionatu vērtīs Latvejis izlasis spēlis. Žūrejis bolvu dabova ari latgaliskais komentietuojs  Arnis Slobožaņins, pazeistams ari kai grupys “Dabasu Durovys” dalinīks.

Arnis Slobožaņins par sovu panuokumu soka: „Jau vairuok kai pyrma goda man īguo pruotā, ka var komentiet hokeju latgaliski, tei ir loba ideja. Tam byutu kai atbolsts, tai ari pīprasiejums skateituoju vydā. Latvejis izlasis voi Reigys “Dinamo” spieļu komentiešona latgaliski byutu breineigs stimuls latgalīšu volūdys modernai atteisteibai. Kod īraudzieju konkursa pīduovuojumu, saprotu, ka juoparauga.  Par hokeju interesejūs jau nu 8. klasis, deļ tuo bolva – braucīņs iz pasauļa čempionatu – maņ byus lels nūtykums.”

Bolvys uzvarietuojim pasnīdze pazeistamais sporta puorraižu bolss i žurnalists Anatolijs Kreipāns.
Hokeja komentietuoju konkursa dalinīkim beja dūts uzdavums komentiet nalelu spielis fragmentu, kuru peic tam viertieja speciala žūreja, kai ari nūtyka interneta bolsuojums.

Arņa komentaru var nūsavērt i nūsaklauseit ite.