Ingrida Tārauda – školuotuoja, teatra i avīzis puļceņu vadeituoja, projektu vadeituoja… bet na tikai – Ingrida Tārauda ir ari dzejneica i Latvejis Rakstnīku savīneibys bīdre. Sovā dīnrokstā Ingrida Tārauda īrakstiejse, ka jai pateikūt

“..vyss, kas irā navyltuots cylvāka sirdī
..malnboltys potograpejis
..lobs čajs
..sarunys uz jumta
..boltais šokolads
..Madisonys apgobola tylti
..Turceja i Īslande!!!
..sīviškeigys lītys, par kurom smejās veirīši – a maņ par tū ni sylts – ni solts
..gudri veirīši”

Bet tai kai vysu vairuok par dzejnīku stuosta juo dorbi, tod nalyls īskots Ingridas Tāraudas dzejūļūs:

***

cīši agrs irā
bolūži vēļ guļ
skuoborsnoj
photo albumā
vīna seja
cytustorp

***

īskotam suleiga zemis
bryuneiguma ocu kruosa
tei sapylda vysu
kū gribu salikt/nūvītuot
apskaut/atrast
tod pīninis atsaver
miļjonim madainu
dzierksteļu
i tovys acs soldonai
smaiduļoj
nazyn voi tymuos atspeidu
ari es

***

napīsauc mani i
pylnu ustobu ar mani
ap mani valkirejis
manī rogonsabatiskuo
uztvere par tū ka
vysam juopuorkuop
napakreitūt īmārcūt
lyupys veinā i
nadzeņus rosā uz
tovys mogorys
dzerūt tukšu
svātlaimis bičeri
varbyuteņ kliušu
uzticeiga

***

acs acs tovys munys
apsavierīņs uz jiuru
krostā īsagulušom
konturom nu myusu
vakarnakts kū viļni
nav nūslāpuši nu putynu
ziņkuoreibys
lānom dalna
rūtaļuodamuos sajauc
smiļts lai caltu
i sadrupynuotu

***

nakts dasakļaun da muna lūga
vāsa smuka slāpumaina
var izdūmuot sazyn kū i nazyn
cik i kuo ari kai
i par edelveisim
i skotim kam napateik drakulys
pat par nūzaudeitu atguojīni jo
vysur kai vinmār –

***

zylgons skusteņš ap koklu
i leipinej smaržuos
gon jau atkluosim
sirdi i bultu
tai irā kod
pasalaiž garom
sikspuorņs
īsaslādz mašinai signalizaceja
aizaver lūgi steidzeigi
pazyud puču pūdi
polūdys skumst
i šokoladis kruosys veirīts
krūgā vanilis saldejumu ēd

***

Boltais šokolads
i zaļais čajs
puors vuordu i vyss
sasaškeļvinej
dūmys mani aizvalk
otkon gryutā
sirdeibā

***

kai mīgā runuojums dīna beja
smoga
stuosteji par ritini zaļā kruosā
e-biļetim bez dereiguma
žaketu ar pūgom kam enkura īspīdumi
kabrioletu kur aizmyguse
guļ nūsaliduojuse kaiva
jiurys vilni smiltīs pajukušu
uz vysom pusem snīdz tu
a sūplok es ar boltu plastmasys
nazeiti šokoladis kremu sagrīžu

***

Vaira dzejūļu i par pošu dzejneicu http://iinngrida.wordpress.com