Ir novembris, i studenti nu Latgolys jau apsiļdejuši dagunu Reigā. Pīdzeivuotys pyrmuos lekcejis, puorbaudis dorbi, nūskaidruots eistīs sātā braucamuos sumkys lelums: taids, kab, nu sātys braucūt, pītiktu vītys buļbim i zupeņai, nu nabyutu par gryutu i varātu jimt liedza autobusa salonā. Students jau aprads ar Reigu i īpazins iteinis cylvākus.

Kab nūskaidruotu, kas pīsaista Latgolys jaunīšūs Reigā i kai jim ite īt, iztaiseju nalelu aptauju.

Kluotīnē cylvāki beja atsauceigi, bet nu vysim, kam nūsyuteju vaicuojumus draugūs, atbiļdeja tik vīns. Laikam latgalīši pi datora nasiež. Beju prīceiga, kod, gatavojūtīs

Universitāšu protesta guojīņam pi Ministru Kabinetu, izdzieržu latgalīšu volūdu. Puiši, kai nūskaidruoju, vuicuos RTU datorzynuotnis i informacejis tehnologeju fakultatē vacuokajūs kursūs, sovā vydā ari Reigā runoj latgaliski i gondreiž vysod ir bejuši lapni par tū, ka īt nu Latgolys.

Treis nu aptaujuotajim myusu pusis jaunīšim Reigā narunoj latgaliski, a vīns narunoj latgaliski vyspuor. Golvanais īmasls, deļ kuo jaunīši nu Latgolys brauc vuicietīs iz Reigu, ir lobuokys nuokūtnis perspektivys, daži gon atzyna, ka tys tai tik licīs. Vīna respondente saceja, ka juos mierkis ir dzeivuot Reigā, dieļ tuo ari studēt izavielejusīs studejis Reigā. Puorejī gryb atsagrīzt dzymtajā pusē, ka byušūt pīmāruoti apstuokli. Ir ari taidi, kas gryb poši radiet tūs apstuokļus – izsuokt uzjiemejdarbeibu i radeit dorbavītys.

Vaicuoju, kuruos situacejuos jaunīši ir bejuši lapni, ka ir nu Latgolys. Vysi saceja, ka ar tū lepojuos i vysvaira lapnumu izjiutūt vaļsts nūzeimis svātkūs i īpazeistūtīs ar jaunim draugim. Originaluokuo atbiļde bejai meitinei, kura ir lapna par latgalīšu temperamentu, uzvaru kuoru karūs, par tū, ka kinā ,,Limuzīns Jāņu nakts krāsā” pasaruoda meitinis nu Leivuonu, i ka Latgolā ir pošys skaistuokuos meitinis.

Kaunejušīs par sovu izceļsmi daži nu aptaujuotajim asūt tod, kod kaids latgalīts paruoda sovu naizgleituoteibu, kaunejušīs ari par augstū bezdorba leimeni Latgolā i par sovu akcentu. Dīvam žāļ satyku ari cylvākus, kas uzskota, ka latgalīšu volūda tikai roda akcentu i traucej pareizi runuot literarajā latvīšu volūdā. Tys, prūtams, īt nu cylvāka, kurs pots latgaliski narunoj. (A attīksme taida, kai, piec munom dūmom, varātu byut dreižuok Ulmaņlaikūs nakai 21.godu simtenī.)

Reiga Latgolys jaunīšim varūt dūt jaunu, plašuoku redzejumu iz dzeivi, īspieju paruodeit sevi cytim, eistynuot sovys idejis, projektus, īpazeit jaunus cylvākus. Latgolys studenti otkon Latvejai varūt dūt sovys zynuošonys i naparostuos idejis. Latgalīši asūt centeiguoki, labsirdeiguoki i vīsmīleiguoki, iztureiguoki gon dorbā, gon aktīvajā atpyutā, nu ari naivuoki, dieļ tuo jūs varūt vīgļuok „nūvest nu ceļa”. Reigys cylvāku buketei taišni pītryukstūt latgalīšu temperamenta i dzeiveiguma.

I nūslāgumā par vīnu nūzeimeigu studentu dzeivis aspektu – ceļu iz sātu. Studenti nu Latgolys ceļā pavoda videji 3,5 stuņdis (tikai iz vīnu golu) i brauc da sātai ik piec 2-3 nedeļom, a moksoj par braucīni iz vīnu golu videji 3,5- 4,5 Ls. Leluokuo daļa laiku ceļā eisynoj, klausūtīs muzyku (dīmžāl tikai puors nu jim – latgalīšu muzyku), losūt voi guļūt. Divi nu aptaujuotajim ceļā vuicuos. Autobusūs var ari sasatikt ar sovim bejušajim školysbīdrim, kas izkleiduši pa dažaidom augstškolom.

Saprotu vīnu lītu: Reigā, sasateikūt ar dažaidim cylvākim, suoc vairuok apsazynuot sovu pīdereibu Latgolai.

Dzintra

Foto: Latgolys studentu spēle pasuocīnī “LU Sāta”, Toms Grīnbergs, Latvejis Universitatis arhivs