“Olūta” i “Tāvu zemes kalendara” attaiseišonys svātki RCB
Ituo goda 16. novembrī Rēzeknis Centraluos bibliotekys skaiteitovā beja sasapuļciejs pruovs puļceņš latgaliskuo vuorda skaiteituoju i Latgolys patriotu, kab kūpeiguos sarunuos i sasatikšonys prīka gaisūtnē svynātu divu nūzeimeigu latgalīšu kasgadejūs izdavumu, „Olūta” i „Tāvu zemes kalendara”, attaiseišonys svātkus.
Latgolys Kulturys centra izdevnīceibys vadeituojs Juoņs Elksnis, kurs stuov pi itūs i daudzu cytu gruomotu šyupuļa, īpazeistynuoja ar pādejā godā izdūtū i planim nuokūtnei. Visi kūpā pīminejom autorus, kuri, nasagaidūt „Olūta” i „Tāvu zemis kalindera” izīšonu, jau aizguojuši tymā saulē…
Par kū prīcojas i suop latgalīša sirds? Leidza prīcai par izdevnīceibys čaklū dorbuošonūs i jaunu gruomotu izīšonu par speiti finansialajom gryuteibom kai kotru godu runom cauri vejuos autoru ryupe par latgalīšu volūdys saglobuošonu i t. s. „pareizū” voi „napareizū” raksteibu. Dūmojūt par volūdys īvuicešonu bārnim/jaunuotnei, kaids pat meklej sponsoru jaunys latgalīšu volūdys vuiceibu gruomotys izdūšonai… Kai saceit pareizi – gasteit voi cīmuotīs, voi latgalīši sovā leksikā par daudz nanūsaslīc iz austrumu kaimiņa pusi, kai naizgaisynuot sovu identitati šudinejā nastabilajā situacejā, skanēja vaicuojumi…
Prīcynojūt publiku, aizgaiņojūt raizis i kleidynojūt nūpītneibu, itymā reizī pasuokumā beja īsaroduse avīzis „Rēzeknes Vēstis” skaiteituojim labi pazeistamuo Pluociņu Mase i ar sovim jūkim sacēļe jautreibys viļni. Ar smaidu par dzeivi runuoja ari vīns nu vacuokajim autorim.
Kab prīca i optimisms bīžuok myus pavoda, kab mozuok dūmstarpeibu! Skaiteisim latgalīšu gruomotys, kab zynuotu, kas nūtics vakar i kas aktuals šudiņ, skaiteisim, kab nanūmierst gruomota, cikom mes stuovam aiz barikadem pi „ō” i „uo”!
Anna Keirāne
Foto reportaža nu “Olūta” i “Tāvu zemes kalendara” attaiseišonys svātkim Rēzeknis Centralajā bibliotekā
Karteņu autors: Anna Keirāne, RCB
