26. novembrī Kuorsovys Tautys nomā sovu 20 godu jubileju svinēja Kursovys Muzykys i muokslys školys pyutieju orkestris. Pyutieju orkestris Kuorsovā bejs jau nu 60-tūs godu, bet kai muzykys školys kolektivs – viņ nu 1991. goda, kas i jimts kai jubilejis atskaitis punkts.

Pasuocīnī tyka atsavārts iz orkestra darbeibu divdesmit godu garumā, iz pīdzeivuojumim i panuokumim. Orkestranti i vadeituoji sajēme apsveikumus nu daudzūs gostu, i, prūtams, poši prīcieja klauseituojus ar sagataveitū koncertprogrammu.

Koncerts suocēs ar fanfaru skaniejumu, cikom orkestra golvonī cylvāki – bejušais vadeituojs Imants Ludvigs Nalivaiko, muzykys školys direktore Vera Krišāne i tagadejais diriģents Aldis Kise – svineigi īdedze sveceitis. I tod jau zalā īguoja poši orķestranti, kab ar pacylojūšu maršu īskandynuotu vokoru.

Pasuocīņa gaitā biļdis i stuosti koncerta gostus i pošus orkestrantus izvede cauri 20 godim koncerteišonys, pīsadaleišonys skatēs, svātku guojīņūs, salidojumūs, festivalūs, dzīšmu svātkūs i tyvuokūs i tuoļuokūs braucīņūs. Orkestris vysūs laikūs ir bejs pīpraseits kolektivs, i dorba svātkūs nikod nav tryucs – ar sovu skaniejumu pyutieji prīcej klauseituojus kai Kuorsovā, tai cytuos piļsātuos i pogostūs, i ir byuts pat aiz Latvejis rūbežu, Boltkrīvejā i Vuocejā. Kai saceja daudzi sveicieji, tod kotrs pasuocīņs, kurymā pīsadola pyutieji, palīk par nūtykumu, deļ tuo kotra orkestra izastuošona ir kas sevišks.

Gostu i sveicieju vydā beja orkestra lobuokī draugi i bīdri – Kuorsovys nūvoda pošvaļdeiba, Malnovys koledža, sābru orkestru dirigenti Egons Salmanis („Balvi”), Sergejs Sergejevs („Rēzekne”) i Valērijs Petrovs (Pyldys pyutieju orkestris), i ar sovim prīšknasumim jaukus breižus saguoduoja vādardoncuotuojis Lauma i Agnese, KMMS deju klasis audzēknis ar daņču izvadumu i KMMS školuotuoju muzykalais prīšknasums.

Orkestra jubilejā tyka gūdynuots na viņ pats kolektivs, bet ari vysi tī cylvāki, kam pyutieju darbeibā bejuse lela nūzeime. Pyrmuom kuortom paļdis tyka saceiti ilggadiejam PO vadeituojam Imantam Ludvigam Nalivaiko, kas orkestri vadieja 18 sezonys. (Školuotuojs Imants, koč i peņsejā, nav atstuojs sovu kolektivu i tān pats ir vīns nu orkestrantim i pyuš tenoru.)

Sveicīni tyka ari vysim školuotuojim, kas paleidziejušs orkestram lobuokam skaniejumam – Vijai Orinskai, Rasmai Kulamovai, Maritai Rudovičai i Denisam Smirnovam.

Taipoš lelu paļdis kai orkestranti, tai i cyti sveicieji saceja KMMS direktorei Verai Krišānei par juos atbolstu i dorbu pyutieju lobā.

I, prūtams, vātraini aplausi i pateiceibys izskanieja orkestra jaunajam i azartiskajam dirigentam Aldim Kisem, kas orkestri voda viņ trešū sezonu, bet juo vadeibā kolektivs ir audzs kai skaitliski, tai panuokumu zinī. Niu KMMS pyutieju orķestrī muzicej 35 orkestranti i pīsavīnoj jauni bīdri i instrumentu grupys. 2011. goda Latgolys nūvoda pyutieju orkestru skatī sovā grupā kuorsovīši Alda vadeibā dabuoja I pakuopi, kas leidz šam ir augstuokais kolektiva panuokums.

Koncertā izskanieja daudzi popularu i pazeistamu melodeju – R. Paula „Fledermausis”, „Tikai vienu reizi”, latgalīšu tautys dzīsmis „Jezups”, „Aiz azara augsti kolni” i „Tuoli dzeivoj muna meiluo” ar defile programmu, orkestrantu pošu meiluokī goboly „Draudzes bazārs” i „Brazil”, kai ari vēļ cyti skaņdorbi. Kai sveicīni sovim školuotuojim orkestranti beja sagataviejuši dzīsmi i prīšknasumu „Orkestrants”, paruodūt, ka pyutieji prūt na viņ pyust, bet i dzīduot!

Pyutieju orkestris kuorsovīšim pateik – tū variēja redzēt piec pylnuo Tautys noma zala i balkona, piec vātrainūs aplausu i ovaceju, kū skateituoji, izskonūt nūslāguma skaņdorbam „Mambo Bando Uno”, kuojuos stuovūt, nažāluoja sovim pyutiejim.

Kai pasuocīņa nūslāgumā saceja direktore Vera Krišāne – reikuot jubileju tyka sasprīsts vīnā piecpušdinī kūpā ar dirigentu Aldi pi kopeja tasis, i nivīns tymā momentā navarieja īsadūmuot, ka golā vyss saīs tik breineigi i vīnreizeji, i ka mozajai Kuorsovys Muzykys i muoklsys školai byus par vīnu lelu sareikuojumu, kū atsacereit ar prīcu, vaira. Nūpalni par tū pīdar vysim – KMMS darbinīkim i školuotuojim, direktorei, dirigentam i draudzeigajam orkestra kolektivam.

Kotrys – kai dalinīki, tai skateituoji – atzyna, ka treis pasuocīņa stuņdis paskriejušs vieja spuornim, i daudzi kur izskanēja dūma par tū, ka taidus pyutieju koncertus kuorsovīši grybātu dzierdeit i jūs vajadzātu reikuot bīžuok.

Paļdis Kuorsovys Muzykys i muokslys školai i orkestram par jaukū duovonu Kursovys i nūvoda dzeivuotuojim i gostim Adventa laika prīškvokorā!

Sagataveja Diāna Orlovska

Fragments nu jubilejis koncerta

KMMS PO “Tuoli dzeivoj” (īroksts nu mieginuojuma)

Biļdis nu KMMS PO jubilejis pasuocīņa