Grupa KRAMPIS aicynoj iz BURKU!
Pyrma laiceņa stuostejom par leivuonīšu grupu KRAMPIS i jūs daleibu i veiksmeim muzykalajūs konkursūs. Tai nu saguojs, ka ar atbaļsteituoju podturiešonu, grupai ir izadevs īkliut konkursa “Burka” finala pīcinīkā i tys zeimoj, ka 9. decembrī KRAMPI vīna vokora ītvorūs vasalys divejis reizes varēs redzēt iz dažaidu Reigys klubu skatuvis: koncertā “Taiseits Latgolā” LMA Studentu Klubā (Raiņa bulvarī 23) i konkursa “Burka” finalā NABAklab (Z.A. Meierovica bulvarī 12).
Pateiceibā par atbolstu, grupa pīduovoj īspieju iz konkursa finalu NABAklabā biletus īsaguoduot par simbolisku 1 LVL. Kab tū izdareitu, leidz 8. decembra 24:00 juodasasoka (syutūt vuordu, pavuordi) pi grupys menedžeris Sandrys Gulbinskys iz e-postu jankovska22@inbox.lv ci atrūnūt jū portalā draugiem.lv (Sandra Gulbinska (Jankovska)).
Koncerta suokums NABAklab 19:00 i tī pīsadaleis taidys grupys:
Remnant of the Sun
The parts
KRAMPIS
The Bloody Dolphin
Act Friendly
Kotra grupa uzastuos 25 minutis, uzastuošonuos seceiba vēļ nav zynoma.
Konkursa uzvarātuojus nūsaceis saguojušūs skateituoju bolsuojums ar kuponim i Latvejis latim (leidz vīnam latam). Kotrai grupai byus sova burka – kurymā konkursa beiguos byus vaira naudys, tei kliust par uzvarātuoju, bolvā dabojūt dzīsmis īrokstu KS Records studejā i vysu naudu, kas ir burkuos – gon sovys grupys, gon puorejūs grupu.
Taitod, ka esi Reigā 9. decembra vokorā, tod plans itaids:
– 19:00 grupys KRAMPIS atbalsteišona konkursa “Burka” finalā
– 22:00 ļustis latgalīšu grupu Green Novice, Krampis, Dabasu Durovys i Laurys Bicānis koncertā “Taiseits Latgolā”
.
