Nedelis kūpsavylkums par nūtykumim i aktualū latgalīšu kulturā i ziņuotū LaKuGā, kab puora šaļtīs byutu informāts par nedelis laikā nūtykušū.

Par nedeli 12.-18.12. 2011. LaKuGā publycāti 20 roksti par dažaidom ar Latgolys i latgalīšu kulturu saisteitom temom.

Pasaverūt iz aizvadeitū nedeli, var pasceit, ka tymā bejušs daudzi Latgolys kulturā nūzeimeigi nūtykumi na viņ nedelis grīzumā.

Nedeli īsuocom ar tradicionalūs rubryku turpynuošonu. Speciali Latgalīšu kulturys gazetys skaiteituojim – Dūmu pylnu pogolmu decembra izlaidums. Taipat beja ari tradicionalais radejis raidejuma „Latgolys Vuorda” īroksts, kurymā tyka stuosteits ari par LaKuGu.

LaKuGā bīži stuostom ari par paradzātom izstuodem i nūtykumim Latgolys Kulturviesturis muzejā, bet ituos nedelis laikā muzejs LaKuGā gasteja vasalys treis reizis – stuostejom par muzeja realizātū pedagogiskū programu – 24 stuņdis latgalīts, kai ari viestejom par pošom puormaiņom muzejā, kas izadevušs ar Rēzeknis pošvaļdeibys projekta “Latgolys Kulturviesturis muzeja āku kompleksa rekonstrukceja” paleigu. Muzejā bejom virtuali gon ar video, gon radejis raidejuma versejuos. Ka turpynojom stuosteit par muzejim – pi seve gostūs gaideja ari Bolvu nūvoda muzejs, kur paradzāta Tradiceju kalendera attaiseišona, kai ari apsaveromys cytys izstuodis.

Aizguojušā nedeļā atsavērem iz aizvadeitim pasuocīnim i aicynuojom iz jaunim. Apsavērem, kai guoja Preiļūs, svietejūt kinys „Cylvāka bārns” 20 godu jubileji, kai ari aicynuojom iz Adventa pasuocīnim Rēzeknē, iz rakstneicys Santys Mežuobelis jaunys gruomotys prezentaceju i Juoņa Streiča izstuodis atkluošonu, kas paradzāta jaunnedeļ, taipat raudzejom mudynuot latgalīšus karteņuos dokumentēt Latgolu „garuos trepis” laikā 13. decembrī.

Aizvadeituo nedeļa bejuse ari taida muzykala – LaKuGys skaiteituojim atruodeiti vasali divi jauni muzykys klipi latgaliski – “Dabasu Durovu” dzīsmei „Trešais pagarynuojums” i grupys „Ginc&Es” dzīsmis „Esi latgalīts” video verseja.

Gaideits nūtykums, kas beidzūt realizeja dzeivē, beja latgalīšu autora Raibuo Suņa gruomotys „Pyrma syltī” izīšona i prezentaceja, kai ari stuostejom par bīdreibys „Latgolys Studentu centrs” ceļojūšu gruomotu goldu, kurymā kai reizi jaunū gruomotu beja vareiba nūpierkt. Ka par tiergim i pierkšonu, tod jaunnedeļ 22. decembrī Reigā (Spīkeru kvartalā) pyrmū reizi nūtyks Latgolys tiergs. Napalaidit garom!

Eipašais latgalīšu kulturā, kas padora itū nedeli par svareigu vysys latgalīšu kulturys vydā – itymā nedeļā tyka izsludynuota pretendentu dasaceišona kasgadejai latgalīšu kulturys Goda bolvai „Boņuks 2011”. Sovus pretendentus var dasaceit leidz jauna goda 13. janvaram. Nu, cikom teik maklāti i dasaceiti pretendenti „Boņukam 2011”, ir atrasti pretendenti „Latvejis muzykys īrokstu Goda bolvai 2011”, kuru vydā ir ari puorstuovi nu Latgolys nūvoda.

Beiguos tik gribim atzeimuot, ka tyvojūtīs Zīmyssvātkim i gaideitam Jaunam godam, ari LaKuGai byus taids „svātku režims” – kotru dīnu raudzeisim ite izturēt svātku sajiutys i nūskanis, apkūpojūt i skaiteituoju viereibai pīduovojūt latgalīšu dzejūļus par Zīmyssvātkim i zīmu, kab raksteit karteņuos i skaiteit pi egleitem dzejūleišus varātu ari latgaliski. Pyrmuos nūskanis var nūgiut jau šudiņ!

Prīceigu jaunu nedeli i cerom iz boltim svātkim (nu vysmoz Latgolā)!

Karteņā: šaļteņa Latgolā, Bieržgaļa golā 11.12.13. 14:15