Andris Viejāns

Zīmā laužu īvys zoru

Es zīmā laužu īvys zoru,
Kas tevi reit un aizpareit
Jau sveicynuos ar saulis storu.

Es aizvakar tur snīgu oru,
Lai soltī kolni ceļūs kreit
Pret pumpuruotū īvys zoru,
Kam naspiej zīdiešonys goru
Pat Lauska ciervs nu kryuma dzeit –
Taipat kai nūdzēst saulis storu.

Nu pumpurim sev jemu sporu,
Nu saulis, kura spūdri speid,
Un zīmā laužu īvys zoru.

Kai jauneibā tū prīceigs doru:
Cik vacumā vēļ dereigs spiets,
Lai nūturātu godu svoru!

Kas dalis maņ gar ļaužu boru,
Kas skaužūt cenšās mēlis treit!
Tev zīmā laužu īvys zoru
Un nasu tū kai saulis storu.

.

Eugenijs Karūdznīks

Zīmys reits

Stuov aiz lūga pīsnidzs duorzs
tai kai zīdūs bolts…
Snīgamuotis patmalēs
vysu nakti molts!

Sirds tūp vīgla, prīceigs pruots.
gaišys dūmys dzymst.
Nūkomuotā dvēselē
šaubys, namīrs rymst.

Tveru otkon vejuli,
spolvu papeiru;
muokslys tālu pasauļam
vuortus paveru.

Rūnās īdvesme i spors,
spuornoj mani rodūšs gors!

1992

.

Ontons Slišāns

Bolts snīgs!
— I ceļa putekli ir aizmiersti…
Bolts snīgs!
— I dubļu lipeiguma naredz…
Bolts snīgs!
— I pasauļs teireibu jov paredz…
Bolts snīgs!
— Voi acīs mīgs? Voi zuduse ir atmiņa?
Bolts snīgs…
— Kaids prīks! Kaids prīks par vysu tū,
Kuo naredz…!

1976

Kartenis: Viļānu nūvoda Mukuļu dzeraune 2009. goda zīmā.

Autore: Ilze Sperga