2011. goda 25. novembrī Kulturys ministreja izsludynuoja konkursu „Integracejis pasuocīni 2011” pīcuos tematiskajuos jūmuos: mozuokumtauteibu kulturys i sovpateibys saglobuošona, pilsūniskuos leidzdaleibys veicynuošona, lībīšu kulturys i volūdys saglobuošona, latgalīšu rokstu volūdys nūstyprynuošona, uorzemēs dzeivojūšūs latvīšu identitatis saglobuošona. Konkursā iz vysom jūmom tyka īsnīgti 55 projektu dasacejumi, nu kurim finansejums daškierts 13 projektim.

.
Konkursa tematiskajā jūmā par latgalīšu rokstu volūdys saglobuošonu pīeimamais finansejums beja 4 000 latu. Projekti, kas dabuoja finansejumu i tiks realizāti:

.
Bīdreibai „Latgolys Studentu centrs” ir daškierts leidzfinansejums 2 projektu realizacejai. Projekta „Latgaliešu kultūras ziņu portāls Lakuga.lv” mierkis ir uzlobuot i pylnveiduot vīneigū latgaliski rokstūšū medeju Lakuga.lv, padorūt tū par īteikmeigu latgalīšu rokstu volūdys izplateituoju i nūzeimeigu Latgolys kulturys nūtykumu i aktualitašu informacejis apmainis vītu Latvejis kulturys i medeju telpā. Daškiertais finansejums – LVL 2 331,00.

.
Ūtra bīdreibys projekta „Vuiceisimēs latgalīšu rokstu volūdu!” mierkis ir paplašynuot latgalīšu rokstu volūdys pratieju lūku jaunīšu vydā, veicynuot jaunīšu interesi par regionalū kulturu, rūsynuot sevkuru izmontuot latgalīšu volūdu na viņ mutvuordu saziņā, nu ari rokstūs. Projekta ītvorūs tiks uzlobuota latgalīšu rokstu volūdys vuiceišonys metodika i organizāti latgalīšu volūdys kursi studentim i školānim. Daškiertais finansejums – LVL 634,00.

.
Sovukuort bīdreibys „Kuzūls” projekta eistynuošonys laikā tiks īstudāta A.Dančys komedeja „Mada pūds” Kuorsovys nūvoda Saļnovys pogosta tautys nomā. Izruode tik izruodeita sūpluok asūšojūs sābru nūvodūs, kai ari Alyuksnis i Gulbenis nūvodūs. Izruodis īstudēšona i izruodeišona veicynuos vītejuo regiona kulturys vierteibu – latgaliskū kulturvidi, volūdu, tradicejis, pīsaistūt jaunatnei interesi latgaliskuos kulturvidis atteisteišonai austrumu pīrūbeža – saglobuošonu. Daškiertais finansejums – LVL 1 035,00.

.
Informaceja par atbaļsteitajim projektim ari cytuos jūmuos atrūnoma Kulturys ministrejis sātys lopā: http://www.km.gov.lv/lv/jaunumi/?news_id=2380

.

.

.