7. janvarī 12 stuņdēs Preiļu Golvonajā bibliotekā nūtiks Preiļu nūvoda jaunūs autoru literaruo almanaha „Sirdsbalsis” attaiseišonys svātki.

Preiļu nūvoda jaunūs autoru literaruo almanaha izdūšonys idejis autore ir Preiļu Golvonuos bibliotekys Bārnu nūdalis vadeituoja Vilhelmīne Jakimova. Almanahs izīs pyrmū reizi – pyrma tam daži nu autorim ir publiciejušīs laikroksta „Novadnieks” literarajā puslopā, dažaidūs literarajūs portalūs, literarajā almanahā „Olūts” i c.

Almanaha „Sirdsbalsis” aizsuokumi meklejami 2007. goda nūgolē, kod Preiļu Golvonuo biblioteka kūpā aicynuoja jaunūs nūvoda autorus, taidā veidā sataisūt naoficialu literarū klubeņu. Piečuok tyka apmaklāti literarūs apvīneibu seminari, giuta pīredze metodiskajā dorbā ar autorim i sadarbeiba ar Latvejis Rakstnīku savīneibys ekspertim. Rakstnīku savīneibys dzejis ekspertam Aivaram Eipuram tyka syuteiti dorbi analizei. 2008. goda martā nūtyka pyrmuo sasatikšona ar Aivaru Eipuru kluotīnē ar nūsaukumu „Es piesaku sevi”, kurā jis sasatyka ar jaunajim autorim, deve nūruodejumus, īdvasmuoja raksteit. 2008. goda oktobrī nūtyka literaruo piecpušdīne „Nāc sildies pie vārdu ugunskura”, kurā pīsadaleja dažaidu paaudžu vītejī dzejnīki. Tod ari roduos dūma par CD ci gruomatenis izdūšonu.

Ar Preiļu nūvoda dūmis i Preiļu Golvonuos bibliotekys finansialū atbolstu 2011. goda ūtrā pusē ideja par gruomotu suoce kliut eistyna. Almanahs izdūts Reigā, SIA „Printstils”.

Literarajā kruojumā puorstuovāti 9 autori. Dorbi puorsvorā ir latvīšu volūdā, diveji autori roksta krīviski i vīna – Laurys Rancānis – dorbi ir ari latgaliski. Laura ir ari vīneiguo, kas roksta puorsvorā prozu, puorejī autori – dzeju. Gruomotā puorstuovātūs autoru vydā ir gon školāni, gon studenti. Puorejī autori: Anna Putāne –studente, Laura Greize – Preiļu Vaļsts gimnazejis  škoļneica, Dāvis Ondzulis – Preiļu Vaļsts gimnazejis škoļnīks, muosys Anna i Madara Pastoris, Rita Cvetkova – Preiļu Golvonuos bibliotekys bibliotekare, Inna Stepanova – Preiļu 2.vsk. školuotuoja, Igors Terentjevs – Preiļu 2. vsk. škoļnīks.

Dzejūļu tematika ir cīši dažaida, bet nūsaukums „Sirdsbalsis” apvīnoj vysus bolsus, kas skaņ kai sauklis, klīdzīņs, uzruna, aicynuojums, atkluosme, atsazeišona, naziņa, cereiba.

Preiļu Golvonuo biblioteka meili gaida gostūs iz almanaha attaiseišonys svātkim!