5. janvarī Ministru prezidents Valdis Dombrovskis sasatyka ar Navalstiskūs organizaceju (NVO) i Ministru kabineta memorandu parakstejušom navalstiskom organizacejom, kam nu jauna pīsavīnuoja 33 organizacijis, kuru vydā beja ar bīdreiba „Latgolys Studentu centrs”.

Memoranda mierkis ir sekmēt efektivys i sabīdreibys interesem atbilstūšys puorvaļdis darbeibu, nūdrūšynūt pilsūniskys sabīdreibys īsaisti lāmumu pījimšonys procesūs vysūs leimeņūs i stadejuos vaļsts puorvaļdē, taidā veidā veicynojūt demokratiskys vaļsts pamatelementa – pilsūniskys sabīdreibys atteisteibu.

Kai sasatikšonys reizē uzsvēre Ministru prezidents Valdis Dombrovskis – ituos vaļdeibys vīns nu svareiguokajim mierkim ir sabīdreibys leidzdaleibys i iniciativys veicynuošona daleibai vaļsts puorvaļdis procesūs, sabīdreibys uzaticiešona vaļsts varai i tīsiskuma nūstyprynuošona. Vaļdeibys i NVO memorandam ir byutiska nūzeima leidzaleibys procesu pilnveiduošonā i NVO ir finansiali atbaļsteitys gon nu vaļsts budžeta, gon Eiropys Savīneibys strukturfondu leidzeklim.

Ministreju snīgtuo informaceja par memoranda mierku izpiļdi 2011. godā līcynoj par aktivu sadarbeibu storp vaļsts puorvaļdis i navalstiskūs organizaceju sektoru – pārnejā godā ir reikuotys 88 savīdriskuos apsprīdis, kai ari 152 publiskuos apsprīšonys. Taipat par augūšū navalstiskūs organizaceju leidzdaleibu lāmumu pījimšonys procesā Ministru kabinetā līcynoj ari tys, ka gondreiž divejis reizis pasalelinuojs NVO puorstuovu skaits ministreju konsultativūs padūmu sastuovā.

Sadarbeibys memorands pījimts 2005. godā i pa itū laiku sovu lobū grybu dialogam ar vaļsts puorvaldi paruodejušs i memorandu parakstejušs jau 237 navalstiskuos organizacejis.

Informaceja par Ministru kabineta i NVO sadarbeibys memorandu apsaverama ITE

Informaceja nu Vaļsts kancelejis olūtim

Karteņa: Toms Norde, Vaļsts kanceleja