Vilis Bukšs, Vileks nūvoda biblioteka

Anša dīnā, 26. janvarī Vileks nūvoda bibliotekys apmaklātuojim beja īspieja sasatikt ar nūvodpietnīku, tulkuotuoju i Bolvu nūvoda literatu Leonardu Rakicki.

Pasuocīns suocās ar Tāvreizi i iz itū kristīšu lyugšonu Leonards Rakickis, kas pots ir aktivs kristeiguos dzeivis popularizātuojs, aicynuoja ari sasatikšonys dalinīkus.

Tuoļuokais Leonarda izsmeļūšais i plaši izvārstais stuostejums par seņuokū Latgolys ailineicu Konstanci Benislavsku i Benislavsku dzymtu kluotasūšajim beja lels puorsteiguoms – tik dziļu pietejumu par sova nūvoda viesturi pyrma divejim symtim i vaira godu nu nūvodpietnīka dzierdēt ir lels ratums. Leonards na viņ ryupeigi pietejs ituos myužnīku dzymtys saknis i cylvāku liktiņus, nu ari daudz tulkuojjs nu pūļu volūdys latgalīšu volūdā i atrads, kai jis pots soka – „atsliedzeņu, ar kū puormeit ailis, kas raksteitys pyrma divejim godu symtim, myusdīnu latgalīšam vīgli saprūtamā veidā”.

Vaira kai divejis stuņdis ilguo saruna nasabeidze viņ ar Benislavsku dzymtys viesturis izkluostu i Konstancis Benislavskys aiļu skaitejumim puormeitā latgalīšu volūdā. Pasuocīņa apmaklātuojim beja īspieja klauseitīs ari poša Leonarda dažaidūs laika pūsmūs raksteituos ailis latgaliski. Sovuos ailēs autors „pavalk iz zūba” gon padūmu i atmūdys laika nūtykumus, gon ari šudiņdīnys nabyušonys, malus i līkuleibu.

Pasuocīņs nūritieja latgaliskā gaisūtnē, deļtuo ka Leonards konsekventi runuoja tik latgalīšu mēlē i eipatnejā Drycanu izlūksnē. Kai saceja pasuocīņa dalinīks Ingars Veļkeris, kam pošam saknis Malienejā, tod, klausūtīs Leonardā, jis vēļreiz puorsalīcynuojs, cik boguota ir latgalīšu volūda sovuos kruošņajuos izlūksnēs!

Pateiceibā par sirsneigū sasatikšonu Vileks nūvoda bibliotekys vadeituoja Vija Circāne ailinīkam i nūvodpietnīka Leonardam Rakickim pasnīdze nalelu puorsteiguma bolvu. Piec pasuocīņa dalinīki tyka aicynuoti iz kūpeigu zīmys piecpušdīnys čaja dzeršonu, kū beja saryupiejs ituo pasuocīņa labvieļs Jurs Boldāns.

Kartenis: Vileks nūvoda biblioteka