2012. goda 6. februarī laikroksta „Rēzknes Vēstis” īlykumam „Mōras Zeme” palyka opoli 15 godi, kam par gūdu 14. februarī Rēzeknis Centraluos bibliotekys skaiteitovā nūtyka laikroksta skaiteituoju i raksteituoju sasatikšona.      

„15 godi – tys ir kumeļa vacums, nu aveizis pastuoviešonai tys ir lobs laika i skaiteituoju viereibys puorbaudejums”, ar itim īvodvuordim i zīdim tyka sveikta „Rēzeknes Vēstu” īlykuma idejiskuo muote Anita Graudeņa. Jei vysu laiku ari ir bejuse pastuoveiga „Mōras Zemes” autore ar pseidonimu Plōciņu Mase.

Ar dzīsmi „Skaista muna tāvu zeme” sasatikšonu muzykali īvadeja folklorys kūpa „Rūta”. „Rēzeknis Vēstu” redaktore Muora Nizinska pastuosteja, ka 20. gs. 50. godūs „Rēzeknes Vēstu” prīškguojieja gazeta asūt izguojuse latgalīšu volūdā. Atmūdys laikā, 90. godu suokuos, izguoja atseviška aveize ar nūsaukumu „Mōras Zeme”, nu finansialu apsvārumu deļ tei sovu darbeibu puortrauce. Nu 1997. goda „Mōras Zeme” kai laikroksta „Rēzeknes Vēstis” dalykums latgalīšu volūdā turpynoj ituos gazetys tradicejis. Tys ir regionaluo laikroksta dalykums ar kulturviesturiskim i religiskim rokstim.

Redaktora izviera, ka gazetai ir pasaveics ar radūšim darbinīkim kolektivā, kas taisa ari cytus tematiskūs īlykumus. „Mōras Zemei” sovus rokstus sovulaik ir syutejuši ar puornūvodnīki. Daudzus raksteit īrūsynuojušys taišni Plōciņu Masis viestulis. Vysvaira rokstu „Mōras Zemē” ir J. Trūpam, J. Elkšņam, A.Babrei, V.Tenčai-Goldmanei ar pseidonimu Dagutakolna Apaleite. „Mōras Zemei” ar pseidonimu Ūtrūs Katre ir rakstejuse ari ailineica L.Apsenīca i c. autori.

Rēzeknis Latgalīšu kulturys bīdreibys vadeituojs Pīters Keišs stuosteja, ka 90. godu laikroksts „Mōras Zeme” beja eipaši pīpraseits. Tauta tod beja izsluopuse piec latgaliskuos literaturys. Latgalīšu rakstnīceibys muzeja vadeituojs Pīters Luocis atsacerieja, ka pyrmajā „Mōras Zemes” numurā 1997. godā beja roksts par juo tāvabuorli, latgalīšu izdevieju Vladislavu Lōci.

„Rēzeknes Vēstu” īlykums „Mōras Zeme” pīsatur pi P.Stroda gramatiskuos tradicejis. Sovā runā tū tradicionali atbaļstieja dedzeiguo ituos raksteibys atbaļsteituoja, pensionātuo školuotuoja Anna Babre, kur izsviera latgalīšu volūdys lūmu i vierteibu. Rēzeknis Augstškolys docātuoja, filologejis doktore I.Šuplinska īsaceja „Mōras Zemes” taiseišonā īsaisteit ari jaunīšus, taidā veidā pavarūt gazetys dalykuma durovys iz prīšku.

Ar klusuma šaļteni i dzīsmi pasuocīnī tyka pīmināta īprīškejā dīnā aizsaulē aizguojušuo īvārojamuo latgalīšu ailineica Bronislava Martuževa.

Sasatikšonys laikā folklorys kūpys „Rūta” izpiļdejumā skaneja daudzys latgalīšu dzīsmis, ari naoficialuo Latgolys himna „Skaidra volūda”, kū vysi atguojušī dzīduoja kuojuos stuovūt. „Rūta” pasaryupieja ari par „Rēzeknes Vēstu” i „Mōras Zemes” raksteituoju ļusteigu apdzīduošonu.

Teksts: Ruta Suseja, Rēzeknis Centraluos bibliotekys vacuokuo bibliografe

Kartenis: Anna Keirāne