Leidz Latgalīšu kulturys Goda bolvai „Boņuks 2011” tik 6 dīnys. Ituos nedelis laikā raudzeisim apsaviert pa kaidai nominacejai smolkuok. Šudiņ suoksim ar 2011. goda lobuokajim latgalīšu muzykys albumim. 26. februarī redzēs, kū byus lāmuse žureja, bet kotrs sovu redzīni var izsaceit aptaujā ite poš sūpluok LaKuGā. Cytim, pasaverūt iz albumu sarokstu, varātu pasalikt jūceigi, ka vīnā kategorejā pīsadola i sovā storpā sasacenš tik dažaidu stilu muzykys albumi, nu latgalīšim jaunu muzykys albumu kotru godu ir tik, cik ir – na cīši daudzi, deļ tuo ari nu vysys ituos sauveitis tiks raudzeits kaidu vīnu drupeit vaira izceļt sauleitē.

Lobuokais muzykys albums 2011

Patrioti.LG „Latgaleite”

2011. goda pavasarī sovu ūtrū albumu ar nūsaukumu „Latgaleite” izdeve grupa „Patrioti.LG” nu Daugpiļs. Grupys pyrmais albums „Daugaveņa”, kas izguoja 2009. godā, dabuoja nominacejis gon „Boņukā”, gon Latvejis Muzykys īrokstu Goda bolvā, taipat ari dzīsmis nu albuma īkliva 2008. goda Latvejis šlageraptaujis finalā. Jaunuokū albumu, kura īkļautys 11 kompozicejis, var saukt par na mozuok veiksmeigu – albuma dzīsmis taipat veiksmeigi pīsadaliejušys Latvejis šlageraptaujis finalā, dzīsmis vēļ arviņ skaņ Daugpiļs teatra izruodē „Klepernīku pogosta zvaigzne”, kai ari tautā guojušys pa cytim celim – ari dzīdūšūs saimu TV šova dalinīku izpiļdiejumā.

Patrioti.LG – Dzeiveite

Ilža „Rūtoj, kaladoj”

Ari Ciblys nūvoda folklorys kūpai „Ilža” „Rūtoj, kaladoj” ir ūtrais albums piec 2007. godā izguojušuo albuma „Ilža”. „Rūtoj, kaladoj” īkļautys 16 gon vaira, gon mozuok zynomys godskuortu īražu dzīsmis – latgalīšu Lendīņu, Juoņu i Zīmyssvātku dzīsmis. 2011. godā vēļ kaida „Ilžys” dzīduotuo dzīsme tykuse albuma formatā – „Skaista, skaista tei muižeņa” ir īkļauta myusdīnu tautys muzykys izlasē „SVIESTS IV”. “Ilžys” albums “Rūtoj, kaladoj” pretendej ari iz Latvejis muzykys īrokstu Goda bolvu par 2011. godu – nominacejā “Lobuokais tautys muzykys albums 2011”.

Ilža i Valērija Satibaldijeva – Skaista, skaista tei muižeņa

Vīteri „Samovars”

Atškireibā nu puorejim kolegim, Rēzeknis folklorys kūpys i kapelys „Vīteri” 2011. goda pavasarī izguojušais albums „Samovars”, jim ir debejis albums, nu iz reizis izguojs kai dubulalbums – gon ar dzīsmem, gon dzīšmu video versejom. „Vīteru” „Samovarā I” īkļautys šmukuokuos „Vīteru” jaunīšu dzīduotuos latgalīšu tautysdzīsmis, bet „Samovarā II” – animacejis kina dzīsmei „Kundzeņš” i diveji foto stuosti dzīsmem „Samovars” i „Atīdami Zīmassvātki”. Ar albuma dzīsmem „Vīteri” uzastuojuši daudzūs koncertūs, sareikojumūs, taipat radeju i TV raidejumūs.

Vīteri – Samovars

Sovvaļnīks „Bolts susātivs”

2010./2011. goda mejā pi klauseituojim nūkliva Sovvaļnīka ūtrs albums ar nūsaukumu „Bolts susātivs”, kas tyka veļteits latgalīšu nūvodnīka, ailinīka Ontona Kūkuoja pīmiņai. Albumā īkļautys 10 dzīsmis i albumā ir vaira akcenta likts iz gitarspieli i tam ir smagnejuoks skanejums, kas kontrastej ari Sovvaļnīka melanholiskū, mīreigū debejis albumu „Sūpluok”, kas izguoja 2009. godā.

Sovvaļnīks – Nikas nav najaušs (Viereibu, video klipā ir vardarbeibys skoti!)