Svātdiņ izzynuojom Latgalīšu kulturys Goda bolvys „Boņuks 2011” īgiviejus. Nominacejā „Lobuokais pasuocīņs/projekts” bolvu sajieme kina „Latgolys laikadečs”, kurys režisoru Edgaru Blinovu aicynuojom iz eisu interveju par Boņuku, dorbim i Latgolu.

LaKuGa: Nu skatuvis saceji, ka itys Tev ir lels i nagaideits puorsteigums. Kaidys ir sajiutys, sajamūt Boņuku?

Edgars: Sajiutys ir naaprakstomys, deļtuo ka teišom nabeju gaidiejs. Poša nominaceja jau beja kai puorsteigums i gūds, bet sajimt Boņuku i pi tuo – pyrmū reizi – tys ir naaprokstami! Kinys taiseišonā vysa komanda īguļdeja lelu dorbu i prīca, ka rezultats ir saguojs taids, kaids ir.

Laiceņš ir puorguojs, i kaidys ir atsaukmis par „Latgolys laikadeči”?

Saceišu skaitļūs – kaidi 70% atbolsta i soka lelu paļdis, 30% nu atsauksmem ir kritika, kas ari ir cīši svareiga, ar kuru riekinūs i jamu vārā, kab jaunā kinā napīlaistu tuos pošys klaidys. Jamūt vārā, ka kina ir par Latgolu i Latgolys viesturi, teišom ir napīdūdami pīlaist klaidys, kaidys varbyut beja, bet deļtuo raudzeišu iz prīšku nu tom izavairet.

Dzeive Tev ar Boņuka sajimšonu nasabeidz. Pyrma nedelis beja akteru atlase jaunai kinai „Vīna vosora deļ vysu”. Kai guoja?

Nui, tūp jauna kina – tei byus myusdīnu latgalīšu drama. Vēļ šūvokor maņ juoizsyuta vysim atlasis dalinīkim atbiļdis, kuri tika i kuri natika. Kūpā beja 58 pretendenti, nu kurim myusim juoatlosa 14 akteri golvonom lūmom, bet byus ari ūtruo plana lūmys i masu skoti. Dorbs beja gryuts, viertiejom gondreiž vysu dīnu – kotram tika dūti 5 minoti, kab cylvāks var pagiut sevi paruodeit.

Kai tod latgalīšim ir ar aktermeistareibu?

Vysaiž. Beja daži ar breineigom spiejom, daži varbyut ar na tik, bet kūpumā ļauds iņteresni i tuo vārti, kab īmyužynuotu kinuos i ruodeitu sabīdreibai.

Tu pots esi režisors ari piec profesejis?

Asu jurists i niu struodoju Latgolys Apgoboltīsā. Kinys režeja maņ ir kai hobejs i pateik nu Rēzeknis Augstškolys studentu pošpuorvaļdis laikim. Tai pavysam nasaisteits  ar pamatprofeseju i natipisks jurisprudeņcei. Pots asu prīceigs – varbyut pagaidom na cīši pasadūd, bet pasadūd i raudzeišu, vuiceišūs iz prīšku, kab dabuotu tū kvalitativū rezultatu.

Par kū taišni Latgola? Sižetu i temu ir cik daudzi…

Maņ ite pateik, es dzeivoju Latgolā. Koč ari pats cīši labi narunoju, kam ir vysaiži īmesli, nu latgalīšu volūda ir munys muotis, babys volūda i maņ prīca, ka ar kinu es varu volūdu i sovu dzimtini popularizēt. Koč ari reizem ir gryuši, nu grybu, kab par Latgolu zyna piec īspiejis vaira!

Karteņā: Edgars Blinovs sajamūt Boņuku. Foto: Edeite Husare, LaKuGa