29. februarī pyrmizruodi Daugpiļs teatrī pīdzeivuoja jauna izruode latgaliski – Monikys Zīlis luga “Rūžys byudu golūs”. LaKuGa ir sajiemuse pyrmū atsauksmi par izruodi, niu padūd tū tuoļuok skaiteituoju viereibai.

Daugpiļs teatris spieris drūšu sūli vierzīnī, kab kliutu par Latgolys kulturys dzeivis centru. Ar Monikys Zīlis speciali teatrim raksteitu monolugu, režisoru Pētera Krilova i Anitys Sproģis incineitū ”Rūžys byudu golūs” tuo repertuarā tagad ir divejis izruodis latgaliski. Ar taidu latgaliskuos kulturys prezentacejis bleivumu navar sasaleidzynuot nivīna cyta profesionaluos kulturys īstuode – ni myusdīnuos, ni paguotnē. Teatra vaļdis lūceklis Oļegs Šapošnikovs jau agruok pīsaceja, ka vīnam nu Daugpiļs teatra smoguma punktim juobyut izruodem latgaliski. Juocar, pīsapiļdeis īprīšk sūleitais i pyrmajā vosorys naktī byus vēļ vīna pyrmizruode latgaliski – Viljama Šekspira luga „Sapnis vasaras naktī”. Pošu reizi jaunuokais īstudiejums teik pīduovuots samārā intensivi, i dreiži tys byus skotoms na tikai Daugpilī, bet 8. aprelī ari Reigā Dailis teatrī.

Aktrise Maija Korkliša puorlīcynuoja i nūturēja skateituoju uzmaneibu, kas stuņdis garumā tikai ar monologu nav vīgli. Atzineiba juoizsoka ari režisorim, kas monologu namonūt puorvierte klusā dialogā ar skateituoju. Ar itū mijīdarbeibu tyka izspālāts ari vīneigais izruodis kuopynuojums, nu suokūtnejuos attureibys, ar sekojūšim eisim kontaktiešonuos mieginuojumim leidz pat piļneigam aktera i skateituoja kontaktam, gluži it kai sābrus aicynojūt iz kukni daleitīs ar saimi, kas tai ir niu iz golda.

Monika Zīle, aprokstūt Latvejis laukus, ruodūt sīvīšu dzeivi laika pūsmā piec naatkareibys atjaunuošonys, ir truopejuse punktūs, kuri uzrunoj: cytu ar interesi i prīcu, cytu — ari ar suopi i aizvainuojumu. Tūmār taida jau laikam ir tei dzeive. Kai jau pīsanuok rakstnīcei i publicistei, kurai vīnaidi tyva ir kai lauku, tai ari sīvīšu tematika, jei iz vysu verās tik intensivi, ka skateituojam veirīšam dažkuort jau voi nāartai byut kluot taidā sīvīšu padareišonā.

Atškireibā nu cytu pošu reizi skateituoju atzeitu kai profesionalūs Reigys i Daugovpiļs, tai ari Baļtinovys amatīru teatra izruožu tūmār nasaveidoj eists kontakts. Runa ite nav par komedejis elementu tryukumu, taidu natryukst ari Monikai Zīlei, runa par kaut kū cytu. Luga nadūd izjiutu, ka te runa par Latgolu i latgalīšim. Režisors i par muzykalū apdari atbiļdeigais Arturs Uškāns pasapyulēja, kab pīsagtu tryukumus, bet patīseibā tei tūmār palīk it kai latgaliski tulkuota latvīšu luga. Naleidz ari lelā daudzumā lītuoti vaci latgaliski, bet skateituoju vairumam pasveši vuordi – tys pat dreižuok vēļ vaira taisa distanci. Var maneit, ka Monika Zīle atstuoja Latgolu tuolajā 1962. godā, i ar izruodi jei nav atsagrīzuse ni myusdīnu dzeivē, ni paguotnē. Puorsteidz ari Daugpiļs teatra acimradzamuo pasivitate, lai nūvārstu vysmoz myusdīneiguos latgalīšu volūdys tryukumus.

Valdis Labinskis

Tyvuokuos izruodis Daugpiļs teatrī paradzātys 24. martā 13:00, 7. i 22. aprelī 17:00.

Izruodis Reigā, Dailis teatra Mozajā zalā 8. aprelī 15:00 i 18:00