16. martā 17:00 stuņdēs Latvejis Universitatis Akademiskajā bibliotekā (Ryupnīceibys īlā 10) atkluos izstuodi „2011. gods Latvejis gruomotnīceibā”, kurā tiks ruodeita i „Latgolys Studentu centra” izdūtuo gruomota „Es soku. Tu soki. Puosokys par krīzi”. Izstuodi organizej Latvejis Universitatis Akademiskuo biblioteka i Latvejis Gruomotizdevieju asociaceja.

Latgalīšu puosoku gruomota ir nomineita gruomotu muokslys konkursā “Zelta ābele 2011”, kū reikoj Latvejis Gruomotizdevieju asociaceja i kas deveņpadsmit godu laikā ir izaudzs par lelu pasuokumu, kas ceļ nūzaris prestižu, veicynoj izdevieju profesionalū izaugsmi i pīsaista plašys sabīdreibys viereibu gruomotom. Itymā godā konkursā “Zelta ābele” 34 izdevieji beja pīsacejuši 95 gruomotys i kalenderus. Bolvai nomineituos gruomotys tiks ruodeitys i cytuos izstuodēs Latvejā i uorpus juos rūbežu.

Gruomotā „Es soku.Tu soki. Puosokys par krīzi” apkūpotys skaistuokuos latgalīšu literaruos i tautys puosokys, dereigi padūmi lātai saimnīkuošonai i sliminīku lečiešonai, roksti par vacajom krīzem i anekdoti par myusu laiku Latveju i vaļdeibu, myusu dīnu jaunīšu raksteiti stuosti ar laimeigom beigom. Gruomota sastuov nu septeņu atsevišku burtneicu, kas sasītys saineitī ar eistu sovetskūs laiku papeira striči, kas piec ilgys mekliešonys tyka atrosts Baļtinovā.

Gruomotys „Es soku. Tu soki. Puosokys par krīzi” izdeviejs ir bīdreiba “Latgolys Studentu centrs”. Idejis autoris ir Marita Papiņa i Ilze Sperga. Gruomotys vuoka dizaina autors ir Aldis Aleks. Izdūšonu finansiejs Vaļsts Kulturkapitala fonds.

Sovu atbolstu gruomotai „Es soku. Tu soki. Puosokys par krīzi” vari izsaceit gruomotu muokslys konkursa „Zelta ābele 2011” leidzjutieju bolsuojumā portalā delfi.lv da 9. apreļa. Prīcuosimīs, ka atdūsi sovu bolsu par myusu gruomotu. Bolsuot vari ite: http://ej.uz/puosokom.