Šudiņ, 19. martā 18:00 Daugpiļs Teatrī sveineigā ceremonejā tiks pasnīgtys Daugpiļs Universitatis (DU) Goda Bolvys zynuotnē i Studentu padūmis Goda Bolvys. Eipaši sirsneigi LaKuGa ar DU Goda Bolvys sajimšonu sveic Valentinu Lukaševiču!

DU Goda Bolva zynuotnē tiks padūta jau trešū reizi i tū sajam DU zynuotnīki, kurim ir izcili sasnīgumi zynuotnē dobyszynuotņu, matematikys i inženerzynuotņu grupā i humanitarūs, socialūs i izgleiteibys zynuotņu grupā divejuos kategorejuos – DU Goda Bolva zynuotnē i DU Goda Bolva jaunajam zynuotnīkam.

Itymā godā DU Goda Bolva zynuotnē daškierta:

– humanitarūs, socialūs i izgleiteibys zynuotņu grupā par nūzeimeigim pietejumim Latgolys tāluotuojmuokslys i arhitekturys montuojuma apzynuošonā Dr.paed., asociātajai profesorei Valentīnai Liepai;

– dobyszynuotņu, matematikys i inženerzynuotņu grupā par izcilim sasnīgumim funkcionalu nanostrukturalu materialu pietnīceibys i holografejis tehnologeju atteisteibā Daugpiļs Universitatē Dr.phys., vadūšajam pietnīkam Vjačeslavam Gerbrederam.

DU Goda Bolva jaunajam zynuotnīkam daškierta:

– humanitarūs, socialūs i izgleiteibys zynuotņu grupā par latgalīšu volūdys i Latgolys kulturys pieteišonu i populariziešonu Dr.philol., docentam Valentinam Lukaševičam;

– dobyszynuotņu, matematikys i inženerzynuotņu grupā par izcilim sasnīgumim funkcionalu nanostrukturalu materialu pietnīceibys i holografejis tehnologeju atteisteibā Daugpiļs Universitatē Dr.phys., pietnīkam Ērikam Sļedevskim.

Catūrtū reizi ceremonejā tiks padūtys ari „Studentu padūmis Goda Bolvys”, kū kasgods sajim lobuokī DU studenti, darbinīki i draugi par īguļdejumu Daugpiļs Universitatis atteisteibā i populariziešonā goda laikā. Bolva teik pasnīgta vairuokuos nominacejuos: Goda students, Goda vuiceibspāks, Goda strukturvīneiba, Goda sasnīgums, Goda darbinīks, Goda labvieļs i nominacejā, kurys nūsaukums teik izvālāts, bolstūtīs iz īsnīgtajom dasacejumu anketom.

Vaira dazynuošonai: http://du.lv/lv/notikumi/events/1570