12. martā Daugovpilī iz presis seansu tyka aicynuoti Latgolys masu medeju puorstuovi, kab pyrmū reizi Latgolā nūsavārtu Latvejā jau sova veida rezonansi dabojušū režisora Aika Karapetjana kinu „Cylvāki tī”* (Cilvēki tur), kū niu ruoda ari Daugovpiļs kinoteatrī „Silverscreen”. Par kinu stuosta Zane Bramane.

Napaseņ maņ beja vareiba baudeit (cytaiž nimoz nadreikstātu saceit) kinu „Cylvāki tī” i kluotīnē pafilozofēt ar kinys režisoru Aiku Karapetjanu.

Nui, kina ir skorba, nažieleiga. Tei precizi runoj par paralelū pasauļu, laika i telpys nūjaukšonu, dzeivi storp latviski i krīviski runojūšim, tureigim i zam iztikys minimuma dzeivojūšim.

Kinys darbeiba nūteik 21. godu symta piļsātvidē, kur storp kuormu masivim globojās „jī” – cylvāki nu cyta pasauļa. Koč ari kinys sižetiskuo lineja atguodynoj amerikaņu action movie, režisors kinā atkluoj ari jaunys, spieceigys kvalitatis – fona trūkšni, vysod kusteigais kadriejums i realī foni (na butaforejis). Lai ari kinys viestejumu var tulkuot cīši daudzveideigi, itei kina poša sevi pīsoka laikam i telpai, kurā mes itūšaļt dzeivojam.

Vārojūt i klausūtīs kinu, puorjam sajiuta, ka myusdīnu Latvejā golvonuos vierteibu kategorejis ir „laiks”, „nauda”, „stereotipi”, i cieški viņ ite dzeišonuos piec plošsazinis leidzekļūs paustim dzeivis modelim ir īmeslis kotra personeigom problemom ci pat tragedejom.

Pusūtru stuņdi garajā kinā režisors ospruoteigi operej ar sapratīni: „mierkis attaisnoj leidzekļus” – cieški viņ taišni vaicojūt: ci esi gotovs kaidam byut leidzeklis juo mierķa pīpiļdeišonai?

Kinys koncepceja raksturoj i paspūdrynoj Artūra Duboka taiseituos kinys „Tī, kur beidzās jiura” (Там где кончается море, 2007) i Danny Boyle kinys “Graustu miljonars” (Slumdog Millionaire, 2008) idejis. Ruodīs, ka itei kina izsauks osys diskusejis škārsteikla vidē i dažaidi aktivisti aizstuovēs obejis kinā paruodeituos pusis – „myus” i „jūs”, latvīšus i krīviski runojūšūs.

Itei ir vīna nu kinom, kurei tik dreiži naaizamierst, deļtuo ka pasoka cīši dziļu patīseibu: „Tici tik tam, kū redzi sovom acim, dzierdi sovom ausim i jiuti ar sovu sirdi.”

Zane Bramane

* Jans ar draugu Krekeri ceinās par sovu vītu skorbajā mikrorajona pasaulī – jūs kontā jau ir vairuokys zuodzeibys i cyti likumpuorkuopumi. Nu, piec sasatikšonys ar Sabīni, skaistu mārgu nu puortikušys saimis, Jans gryb maineit sovu dzievi i meklej celi iz lobuoku sabīdreibu. Nu dasavīnuot „zalta jaunatnei” izaruoda na tik vīnkuorši – juo cereibys iz mīlesteibu i jaunom īspiejom taisuos sakrist, i ruodīs, ka itymā dzeivē jis var pasaļaut viņ pots iz sevi.

Vaira par kinu: http://www.cilveki-tur.lv/

Seansi Daugovpiļs kinoteatrī „Silverscreen” itymā nedeļā kotru dīnu 15:45 i 19:45.

Karteņa: kinys publicitatis materiali