Šudiņ Daugovpiļs Universitatē nūtyka regionalais forums „Iespēja Latgale”, kurā pīsadaleja ari vidis aizsardzeibys i regionaluos atteisteibys ministrs Edmunds Sprūdžs, ekonomikas ministrs Daniels Pavļuts i lobkluojeibys ministre Ilze Viņkele, kai ari Saeimys Eiropys lītu komisejis vadeituoja Zanda Kalniņa-Lukaševica.

 Itymā forumā kotrs varēja īsapazeit i diskutēt par Vidis aizsardzeibys i regionaluos atteisteibys ministrejis reiceibys grupys sajimtim i apkūpuotim īrūsynuojumim i giut īskotu par byutiskuokim eistynojamim aktivitašu vierzīnim Latgolys atteisteibai, kas izsokomi atslāga vuordūs – mobilitate, sadarbeiba, resursu pīeimameiba i iniciativa.

Foruma laikā vidis aizsardzeibys i regionaluos atteisteibys ministrs E.Sprūdžs izsviere: „Vīns nu prioritarim vierzīnim, kurā pošu šaļti ir juostruodoj, kab nūdrūšynuotu Latgolys regiona ilgtspiejeigu atteisteibu – juonūdrūšynoj pokolpuojumu pīeimameibu regionalajūs centrūs. Kotram nu myusu ir juosaprūt, ka tei ir divvierzīņu mobilitate, kas paradz atgrīzenisku kusteibu – īdzeivuotuoji pi pokolpuojumim i pokolpuojumi pi īdzeivuotuoju”.

„Latgolys regiona reiceibys plans bolstuos četrūs atslāga vuordūs aba principūs: mobilitate, resursu pīeimameiba, sadarbeiba i iniciativa. Ir lītys, kū itūs princypu pīpiļdeišonā varam eistynuot izreizis, par pīmāru, ES strukturfondu leidzekļu nūvierzeišona industrialūs zonu atteisteibai regionā, seminari i konsultacejis izjiemiejdarbeibys suokšonai i veicynuošonai, nu ir lītys, kuru eistynuošonai byus vādzeigs ilguoks laiks i vysu pušu kūpdorbs i atbolsts. Par pīmāru, Ekonomikys ministrejis golvonuo prioritate ir industrialuo politika, kurys vīns nu aizdavumim ir atjaunuot ražuošonys bazi Latvejā, kab veiduotu ilgtspiejeigu izaugsmi vysūs Latvejis regionūs, rodūt jaunys i lobuok apmoksuotys dorbavītys, īnuokumu pīaugumu i lobkluojeibu. Tys pots attīcynoms ari, par pīmāru, iz energetiku, kurys ilgtermeņa strategeja ir svareiga kotra izjiemieja atteisteibai i ekonomikys konkurētspiejai, kotra īdzeivuotuoja dzeivis kvalitatei. Tī nav vīnys dīnys aizdavumi, nu, konsolidejūt spākus, resursus, zynuošonys i pīredzi, rezultati byus,” izsviere ekonomikys ministrs Daniels Pavļuts.

Lobkluojeibys ministre I.Viņkele: „Leluokais īgivums nu ituo foruma munā izpratnē ir īspieja izklauseit realus i interesantus prīšklykumus nu pošim latgalīšim, i na mozuok svareigi, ka itei iniciativa demonstrieja ari sekmeigu storpministreju darbeibu. Pasuocīņa laikā nūguoju pi secynuojuma, ka treis pamatakmini lobkluojeibys ceļšonai Latgolā ir izgleiteiba, celi i atbolsts izjiemiejdarbeibys izsuokšonai.”

Foruma nūslāgumā kluotasūšī vīnojās, kab kūpeigim spākim sataiseitu Latgolys regionu par plaukstūšu atteisteibu i īdzeivuotuojim i izjiemiejim īspiejom boguotuoku, t.i, „Idealū Latgolu”, ir pādejais laiks vuiceitīs nu klaidu i kūpeigi struoduot vysom sferom.