Apreļa suokuos Rēzeknis Centraluos bibliotekys (RCB) direktore Marija Sproģe i juos vītneica Marija Šeršņova pīsadaleja Pleskavys Universalajā zynuotniskajā  bibliotekā (PUZB) nūtykušajā 3. konferencē „Pīrūbežys kultura”* („Культура Приграничья”). Ar Rēzeknis dūmis atbolstu iz Pleskavu tyka nūguoduotys ari latgalīšu gruomotys nu Rēzeknis Centraluos bibliotekys fondim, i tuos izstuodē varēja apsavērt konferencis daleibnīki i gosti. Storptautiskais gruomotu forums „Krīvu rītumi” („Русский Запад”), kura ītvorūs nūteik gruomotu tierdzeni, tikšonuos ar rakstnīkim, gruomotu prezentacejis i opolī goldi par vysaidim tematim, Pleskavā šūgod nūtyka jau deveitū reizi. Iz konferenci ūtrū godu piec kuortys Rēzeknis bibliotekarus īlyudze PUZB direktore V. Panova.

Latgalīšu gruomotu dīnys ītvorūs Rēzeknis Centraluos bibliotekys puorstuovis konferencī izastuoja ar ziņuojumim par gruomotu izdūšonys viesturi Latgolā, par latgalīšu literaturys atteisteibu, latgalīšu liktinim, myusu nūvoda kulturys vierteibom i viesturiskajom tradicejom. Itū nūtykumu ir atspūguļuojuši vairuoki Krīvejis masu medeji. Referati, ar kurim izastuoja bibliotekys puorstuovis, tiks publicāti kuortejā konferencis materialu kruojumā, i ar Latgolys viesturis, kulturys i tradiceju vaicuojumim krīvu volūdā varēs īsapazeit plašuoks interesentu lūks. Vairuok zynomi aiz myusu vaļsts rūbežom tagad byus taidi vuordi kai A. Jūrdžs, P. Miglinīks, F. Kemps, F. Trasuns i O. Rancāns, V. Seile i B. Brežgo, V. Luocs i M. Bukšs, O. Rupaiņs, J. Klīdziejs i J. Eļksnis.

2010. godā tyka nūslāgts sadarbeibys leigums storp RCB i PUZB, i jau 2011. godā M. Sproģe i M. Šeršņova ar ziņuojumim par Latgolys Kulturys centra izdevnīceibys dorbu i rēzeknīšim Pleskavys biografiskajā vuordineicā pīsadaleja 2. konferencē „Pīrūbežys kultura”.

Informaceju sagataviejušys Marija Šeršņova i Anna Keirāne, Rēzeknis Centraluo biblioteka, kartenis – foto Marija Šeršņova.