5. majā Reigā, kopejneicā „SKĀbene” (Alksnuoja īla 14, Alberta laukums) byus kaids koncerts, kurā atguojušūs prīcēs divejis mārgys nu Latgolys, tīsa gon – dzīžūt pa lelam angļu mēlē: Laura Lō (Laura Ločmele) nu Bolvu i Evija Smagare nu Daugovpiļs. Dzīšmu autoris i izpiļdeituojis, kas pa mozeišam īkuortoj sovu vīteni Latvejis muzykys ustobā.

Koncerta suokys 23:00, īeja bez moksys. Koncertu reikoj „m&m’s music management”.

Bet pyrma koncerta tim, kas nikuo nazyna par itom mārgom, teik dūta īspieja koč drupeit īsapazeit. Vaicuoja – Mārtiņš Meitiņš Bītiņš Beitiņš i Maija Rožkalne, atbiļdieja – Evija Smagare i Laura Lō.

Evij, pastuosti, lyudzu, kai Tu kūpā ar grupys „Pruota Vātra” puišim daguojot da sovam kūpdoram – kompozicejai „Nākamā nodaļa”, kas ir īkļauts jūs jaunuokajā, piec skaita nu jau 10. studejis albumā ar nūsaukumu „Vēl Viena Klusā Daba”?

Evija: Nui, tai nu gadejuos, ka kūpeigi asom īrakstejuši dzīsmi. Itei dzīsme vēļ navā tykuse pyrmatskaņuota, nu tys byus 7. majā, kod byus „Pruota Vātrys” jaunuo albuma prezentaceja. Bet tei beja spontana ideja, deļ tuo ka nu suoku dzīsme tyka īraksteita bez muna bolsa i, pryncypā, beja jau gotova, nu tod puiši izdūmuoja, ka tys varātu byut duets. Vyss suocās ar tū, ka maņ atguoja viestule portalā draugiem.lv nu Ingara Viļuma („Pruota Vātrys” basgitarista), kurymā jis maņ izsaceja pīduovuojumu dzīduot kūpā ar jim i, prūtama līta, es pīkrytu! Kod vaicuoju Renāram Kauperam, kai jī mani ir atroduši, jis atsaceja, ka Ingaram Viļumam asūt bejs aizdavums izzondēt latvīšu muziķu daiļradis i atrast vysu atbylstūšuokū variantu duetam. Tai nu sasagadeja, ka jis pīviersa viereibys taišni maņ. Grupai īsapatyka muna bolsa tembrs i jī izlēme mani izaicynuot. 29. martā ar Renāru devemīs pi Ingara iz juo dzeivūkli, īrakstejom muna bolsa partejis. Rezultats vysim myusim ruodejuos cīši veiksmeigs i tai ari tys tyka akcaptāts.

Kai Tev īt ar dorbu pi pošys debejis albuma… pastuosti drupeit, kū mes tī dzierdiesim?

Evija: Nasaverūt iz studejom Latvejis Kulturys akademejā i vēļ dažaidom naskaitomom nūdarbem, albums pa mozeišam tūp i varu atkluot, ka dreižumā izīt vēļ vīns jauns singls ar nūsaukumu „Short Story about Time Breathing”. Itū kompoziceju varēs dzierdēt ari koncertā kopejneicā SKĀbene. Paraleli tam studejā tūp vēļ daži muni goradorbi. Kūpumā varu saceit, ka albumā varēs sagaideit muzykalū dažaideibu, jaunys dvesmys i idejis. Tai kai vyss vēļ ir procesā i gola dūma par albuma skaniejumu nav izakristaliziejuse, idejiski šys tys var pasamaineit, nu tys jau palīk munā ziņā. Kotrā ziņā dreiži caru otkon byut „iz streipis” i turpynuot aktivi muzicēt i prīcēt sovus klauseituojus.

Reitu kūpā ar Lauru Lō Vacreigys kopejneicā SKĀbene Tu izastuosi ar akustiskū programu. Kū publikai pīduovuosi? I kaidys ir Tovys dūmys par Lauru Lō, ar kurū Tevi saista ari kūpeigs producents Kaspars Ansons?

Evija: Koncertā SKĀbenē izpiļdeišu sovys pošsacarātuos dzīsmis, i ari kaidys cover versejis dažom pasaulī jau atzeitom i popularom kompozicejom, kai ari raudzeišu radeit pateikamu nūskaņu, nu vaira vysu var izzynuot ateimūt iz koncertu! Ar Laurys Lō daiļradi asu īsapazynuse jau īprīšk i varu saceit, ka juos muzyka Latvejā ir kas ni jauns i inovativs. Juos skonu dorbi, munupruot, ir veiksmeiga realizāta ideja, interesants ruodīs skaniejums apvīnojumā ar juos bolsu, rodūt taidu kai harmoneju nūskaņā. Kai soka – nikuo ni dalikt, ni atjimt! Var just ari tū, ka juos dzīsmis īt nu dvēselis. Jai es pavysam nūteikti vieleju sasnīgumus i veiksmi juos darbeibā iz prīšku, jo vīnnūzeimeigi – tys ir talants, kas „juoceļ sauleitē”.

Taids pats vaicuojums Laurai par koncertu i Eviju…

Laura Lō: Koncertā pīduovuošu koč kū cīīīīši eipašu… navar jau tai par reizi vysa atkluot! Pīduovuošu kruosainu akustiskū skaniejumu, kab publika varātu izdzeivuot munus stuostus. Hmmm…. par Eviju gryuši pasceit – vēļ juos napazeistu, naasu klausejusīs ari juos muzyku, nu vysod atbolstu cylvākus, kas ir rodūši i sapinej skali.

Da itam Tu esi izdavuse treis breineigus singlus: „Far Away”, „Sweet Commotion” i „You Blow Me Away”. Pastuosti, lydzu, kotrys ituos dzīsmis īdvasmys olūtu/topšonys viesturi!

Laura Lō: Īdvasmys olūts vysom dzīsmem vīnnūzeimeigi ir emocejis. „Far Away” – sapineišonys i mieneša apspeidātys nakts dzīsme, „Sweet Commotion” – kai atsluobynūša šyupeļdzīsme – tei ir iz vysa symta procentu par mīlesteibu i uzticeibu, „You Blow Me Away” – par „baisūnim i vampirim”… kaisme i īkuore. Varu viņ dalikt, ka ituos vysys dzīsmis topušys vālai nakti, jo tys pa lelam ir muns rodūšais laiks…

Tu esi nu Bolvu. Deļkuo atškireibā nu daudzim muzikim, kas īt nu Latgolys, izavieleji radeit absoluti itam myusu vaļsts regionam narakstureigu muzyku i dzīduot angliski na latgaliski kai dora Tovi nūvodnīki – Borowa Mc, Bez PVN, Dabasu Durovys i c.?

Laura Lō: Pa munam tys nav svareigi, nu kureinis īt cylvāks… svareigi ir tys, kū i kai jis dora. Es doru tū, kū maņ pateik dareit. Zynu vairuokys volūdys, nu vysvaira maņ pateik raksteit i dzīduot dzīsmis angļu volūdā.