19. majā Vileks nūvodā jau ūtrū reizi nūtyka Vileks nūvoda Bārnu i jaunatnis radūšais festivals “Nūgluosti putynu i paprosi tam spuornu”, kurymā pīsadaleja 410 bārni i jaunīši nu dažaidim nūvoda školu kolektivim.

Vileks estrade ar lelim i mozim nūvoda dzīduotuojim i doncuotuojim, muzykantim, školuotuojim i vacuokim pīsapiļdeja jau reita agrumā, kab kūpeigi paraudzeitu dzīsmis i dzigys.

Festivals suocās ar dalinīku guojīnu pa Vileks piļsātu iz estradi i turpynuojās koncertā, kurū atkluoja Vileks nūvoda dūmis prīšksādātuojs Sergejs Maksimovs.

Par festivala muokslenīcyskū nūformiejumu beja pasaryupejuši Lana Ceplīte, Valentīna Beča, Andra Korņejeva, Inese Circene, Agris Mednis, Juoņs Laicāns, Viktorija Zaharova, Lana Pužule sadarbeibā ar svātku režisori Inetu Lindenbergu. Festivalu vadeja Karīna Makšāne i Anda Sergejeva.

Vileks nūvoda Bārnu i jaunatnis radūšajā festivalā pīsadaleja 15 nūvoda školu, pyrma izgleiteibys īstuožu i interešu centru 44 kolektivi, kurūs vydā beja ari pavysam jauni nūvoda kolektivi – Vileks muzykys i muokslys školys folklorys kapela i cytu školu ritmikys grupys.

Taipat prīca, ka festivalā skanieja ari latgalīšu volūda eipaši folklorys kūpu bārnu izpiļdejumā.

Sagatavieja Terēzija Babāne

Karteņuos – Vileks nūvoda II Bārnu i jaunatnis radūšais festivals “Nūgluosti putynu i paprosi tam spuornu”, foto Vineta Zeltkalne