Ituos nedelis golā, 8. i 9. junī, Sanktpīterburgā pymrū reizi byus Latgolys dīnys, kuru ideja izadevuse pasasokūt veiksmeigai Latgolys regiona atteisteibys agenturys i Latgolys planavuošonys regiona sadarbeibai ar Latvejis Republikys generalkonsulatu Krīvejis zīmeļu golvyspylsātā.

Sanktpīterburgā gasteis Latgolys amatnīki i folklorys kūpys, kurī īpaziestynuos piļsātys īdzeivuotuojus ar Latgolys nūvoda eipatneibom, amatnīceibys tradicejom i kulinarū montuojumu. Latgolys dīnuos pīsadaleis folklorys kūpys „Ceiruleits”  nu Leivuona i „Sovvaļnīki”  nu Dagdys nūvoda Ondrupinis. Senejūs omotu tradicejis Sanktpīterburgys īdzeivuotuojim ruodeis vaira kai 25 dažaidim amatnīki – keramiki, audiejis, kaļvi, maizis cepieji, pinieji i cyti omotu meistari.

Latgolys dīnys Sanktpīterburgā byus divejis dīnys: 8. junī pasuokums byus Latvejis Republikys generalkonsulatā Sanktpīterburgā, kur tiks reikuota pījimšona turoperatorim, masu  medeju puorstuovim, kai ari augstim gostim nu Saktpīterburgys piļsātys administracejis, nu 9. junī vysys dīnys garumā ar Latgolys regiona folkloru, amatnīceibu, tradicejom i kukni varēs īsapazeit vysi interesenti, kas atīs iz Kirova centralū kulturys i atpyutys parku.

Latgolys regiona atteisteibys agentura car, ka ar itū sadarbeibu vēļ vaira tiks veicynuota turistu plyusma nu Krīvejis iz Latgolu.

Karteņā – folklorys kūpa “Ceiruleits” Latgolys dīnā Breivdobys muzejā