Šudiņ taida kai svātku dīna ari Rēzeknis Augstškolys Studentu teatrim „ĶerRA”. 85 godu jubileju svietej studentu teatra dibinuotuojs, trimdys dramaturgs Arturs Tuolivaļds Rubeņs. Ari Latgalīšu Kulturys gazeta syuta dramaturgam sveicīņus jubilejā!

A.T. Rubeņs dzims 1927. goda 5. junī tādinejuo Rēzeknis nūvoda Bieržgaļs pogosta Silaunīkūs. Guojs školuos Viļānūs, Ruguotūs i Varakļuonūs, nu 1944. godā pamat Latveju i nūbrauc iz Vuoceju, tod ASV. Vuocejā studiejs boltu filologeju  Baltejis Universitatē Pinnebergā, piečuok 1954. godā pabeidzs Emersonys koledžu Bostonā ASV, kur sajiems gradu dramā i Bostonys Universitatis teatra školu, kur 1956. godā īgive gradu režejā i teatra pedagogejā.

Rubeņs pīrakstiejs vaira kai 90 lugu (tūs vydā ap 32 latgaliski raksteitys), pīsadaliejs kai akters i režisors ari ap 40 izvadumūs. Tulkuojs lugys nu lītaunīku i angļu volūdom, rakstejs gruomotys par teatri. Autora lugys ir izvastys ASV, Latvejā i Australejā. Latgolā izruodeišonu pīdzeivuojušys Bieržgalī, Rēzeknē, Kruoslovā, Izvaltā, Leivuonā, Viļānūs, Maltā, Jasmuižā, Drycanūs i cytvīt.

Deveņdesmytūs godu suokuos organiziejs i vadiejs latgalīšu dramaturgu seminarus Rēzeknē i Bieržgalī. Taipat bejs gostlektors Rēzeknis Augstškolā, kur vadiejs kursus skatuviskuos režejis pamatūs školuotuojim i pošdarbnīkim, lekceju kursus par latgalīšu dramys montuojumu i dramaturgejis pamatim. Iz Rubeņa lekceju kursa „Režejis pamati” bazis sovulaik 1994. godā dzims ari Rēzeknis Augstškolys studentu teatris „ KerRA” i Arturs Rubeņs bejs pyrmuo jaunuo studentu teatra izvaduma vadeituojs.

Dzeivoj i struodoj ASV, Ohaio štata Klīvlandē i turpynoj dorbu pi zynuotniskuos i daiļliteraturys topšonys. Nanūviertiejams ir ari Rubeņa dorbs pi latviskuo gora saglobuošonys tī puori okeanam.

Informaceja nu Rēzeknis Augstškolys sātyslopys i Drycanu kulturys bīdreibys „Auseklis” izdavuma „SKREINE”.