Par Juoni Raksteņu maņ grybātūs saceit, ka jis ir vīna nu Bierzpiļs pusis jaunajom dzierkstim. Bīžuok juo vuords teik nūsaukts saisteibā ar sportu – jis reikoj vysaidys sporta saceņseibys, struodoj Bierzpiļs pošvaļdeibā par sporta pasuokumu organizatoru. Tikpat aktivi pīsadola kulturys pasuokumu reikuošonā – ir Ruguoju nūvoda Lozdukolna pogosta kulturys dorba organizators, aktivūs i radūšūs jaunīšu bīdreibys “SPIĻKA” vaļdis lūceklis. Bet tys nav vyss – mani pīsaisteja i īinteresēja juo, varātu saceit, aizaraušona ar kuozu vuortu reikuošonu. I deļtuo, kab izzynuotu kū vairuok, aizdevu jam puors vaicuojumu.

Kod itei ideja par kuozu vuortu reikuošonu aizasuoce i kam beja pyrmī reikuotī vuorti?
Ideja aizasuoce jau cīši seņ, kod vacuoki pajēme myus leidza iz kuozu vuortu reikuošonu sovim sābrim. Atguodoju, ka vuortim tematika beja saisteita ar zemissardzi – puorbaudejom, voi nav kaida kontrabanda pi jaunlauluotūs i voi nav nūzoguši kaidu jauku meitini – leigovu.
Patyka atmosfera i patyka redzēt jaunū puori jūs eipošajā dīnā. Kuozu vuorti ir taids breids, kod vari iz momentu pīsadaleit kuozuos, koč eisti naesi aicynuots. Deļtuo itū daleibu mes parosti raugam izplanavuot interesnu, naaizmierstamu i jautru. Pyrmī kuozu vuorti, kurymūs es pīsadaleju, taitod beja pyrms kaidu 15 godu. Pa itū laiku tik daudz vuortu sareikuots, ka pat navar saskaiteit.

Voi tovi vacuoki bīži reikuoja kuozu vuortus?
Jauneibā vacuoki taiseja kuozu vuortus, tod i beja vairuok īspieju sataiseit, partū ka reši kurais dzeivuoja kūpā taipat, puorsvorā jau apsaprecēja. I leidz ar tū gondreiž kotru nedeļu vosorā varieja taiseit vuortus. Tagad daudz kas ir izamainejs i vaira na tik bīži jaunī nūlem apsaprecēt, bīžuok jau dzeivoj kūpā taipat.

Kur tu smelīs idejis? Voi esi pietejs koč kū i nu tradiceju?
Mes idejis parosti smeļamīs nu jaunuo puora, izpietejam jūs profesejis voi hobejus. Vēļ dažreiz idejis smeļamīs taišni nu godalaika, kurā īkreit kuozu datums. Par pīmāru, ka puors ir sportisti, tod mes taisom kuozu vuortus taidus sportiskus. Ka kuozys īkreit, par pīmāru, 18. novembrī, tad saistom ar Latvejis vaļsts svātkim i tt. Idejis rūnas nu vysaidu lītu, kū redzim ikdīnā, atrūnam internetā voi vīnkuorši īsašaun pruotā kaidam. Tradicionalūs kuozu vuortus ari asu papietejs i taisejs, nu tradicionalais ir radzāts cīši daudzuos kuozuos, deļtuo bīžuok taisom kū jaunu voi ari tradicionalajam pīlīkam kluot kū jaunu.

Voi jums ir kaidi tipiski kuozu vuortu motivi, kū jius izspielejat?

Puorsvorā jau tipisku motivu tūmār nav, raugam vysod izdūmuot koč kū jaunu. Tipiski voi vysmoz leidzeigi ir aizdavumi, kurus līkam dareit jaunajam puoram, no vysod jau raugam īvīst koč kū jaunu, lai interesantuok. Asom bejuši – Latvejis izlases hokejisti, hokeja fani, futbolisti, kas dūdas iz pasauļs čempionatu, Zīmassvātku veceiši, Playboy zači, slaveneibys i filmu zvaigznis, pirati, veirs, kas pazaudējs sīvu, i juo draugi, Leldīnu zači, sieņuotuoji, zemissorgi, muitnīki i tt.

Kaidi ir tovi nūvāruojumi par jaunuo puora voi varbyut pat puorejūs gostu reakceju iz kuozu vuortim?
Parosti jau vysi jaunī puori i gosti pījem kuozu vuortus ar smaidu i interesi. Vysu leluokuo nūzeime gon ir vediejim voi kuozu organizatorim, deļtuo ka ar jim saīt vysu leluokuo runuošona. Gostim pateik, ka ir vairuok vysaidu darbeibu, a jaunajam puoram bīži viņ ir par gryutu sovu zolidūs driebu deļ, nasagryb nūsazīst. Deļtuo tys vyss ir juosaplanavoj. Reakceja ir bejuse vysaida. Ir bejs, ka jaunais puors kavej, napaspiej iz kaidu īplanavuotu vītu, tod var just, ka vedieji steidzynoj kuozu vuortus. Ka gars ceļs braukts voi korsta dīna, tod gosti ari parosti mozuok aktivi.

Ar kū myusu dīnuos parosti atsapierk jaunais puors?
Jaunajam puoram pyrmom kuortom juoatsapierk ar myusu aizdavumu izpiļdeišonu, tuos ir vysaidys darbeibys – skaistu vuordu saceišona, dzīduošona i tt. Kad jī izpylda aizdavumus, tod mes jūs palaižam. Naskaitam, ka duovonys par kuozu vuortim ir svareigys, nu ir pateikami sajimt gordumus i vysaidus padzierīņus. Tys nav obligati i vysūs kuozu vuortūs mes tū i pasokom. Mes poši jaunajam puoram parosti sataisom kuozu vuortu karūgu i jū izduovynojam.

Kai tu pats dūmoj – vuorti ir svareiga kuozu sastuovdaļa, vajadzeiga?
Es skaitu, ka kuozu vuorti ir svareigi, deļtuo ka dūd īspieju puorbaudeit jaunuo puora saskaneibu, pasaruoda jūs mīlesteiba, nu tuo ari palīk pateikamys atminis par jūs kuozu dīnu. Taipat palīk interesnuoks ceļa pūsmys no bazneicys da kuozu sātai, deļtuo ka nikod jau nazyni, kur i kaidi byus kuozu vuorti i kuri byus tī, kas jaunū puori atguoduos. Dūmoju, ka kuozu vuorti ir vajadzeigi i deļtuo ka, jo tu naesi saukts iz kuozom, no gribi apsveikt jaunū puori, tū vari izdareit, sataisūt kuozu vuortus. Taidā veidā, maņ ruodīs, vari izruodeit jim gūdu.

Kaida ir Tova komanda i kas jūs mudynoj pīsadaleit tymā vysā?
Muna komanda ir muna saime – muosys i bruoli. Vēļ pi komandys pīdar aktivuokī i rodūšuokī draugi. Daudzi nu komandys dzeivoj Beļausku cīmā. Jūs motivi ir taidi paši kai maņ – vajag koč kū jautru i lobu izdareit, kab byutu kū atguoduot i piec tam ar prīcu izstuosteit bārnim i unukim.

Lai Juoņam i juo komandai veicās i iz prīšku!

Ar Juoni Raksteņu sasarunuoja Kristīne Pokratnīce

Kartenis nu personeiguo arhiva