Pasastaigoj dzaltoni reiti. Sveicynoj mani pa gobolu. Es izalīku, ka naradzu. Piec mirkļa puordūmoju i atsveicynoju atpakaļ. Maņ nav žāļ, ka jī mani pazeist. Kurs mani pamūdynuos? Varbyut Tu? Bet Tev taču pošam vyspyrms juopasamūst! Naivais! Aizmygušais!

Nakts vydā ceļūs i skrīnu. Bosom kuojom. Pa Parādis 11 iz Sporta 6. Kas mani naīlaiss? Es taču asu es! Luksofori speidynoj dzaltonū gaismu. Laternys vylynoj ūdus. Tuolumā aizbrauc kaida mašyna. Es nasaveru iz zebru. Es pakreitu iz tramvaja slīdis. Labi, ka maņ ir plaukstys, iz kurom atsabaļsteit! Es asu sasytuse sovu kreisū celi. Syurst. I es pīmiņu, kai syurstēja sirds. Man palīk žāļ. Pošai sevis i paguotnis. Es raudu. Naatgrīzt tū laiku. Tikai atcerētīs. Cik labi! Cik labi, ka tai! Nadaleita sirds. Es sev soku. Nadaleita sirds. Svareiguoka par vysu. Kur tī naudys moki dabasūs, kur juokruoj monta? Kur jī ir? Pasaveru iz augšu. Es radzu tikai daudzstuoveņu golūtnis. Juos kreit maņ viersā. Golva reibst. Koč kur blonduos īkšpogolmu kači. Viejs nas kastaņu nūbyrušūs zīdus. Tuolumā atspied dzelzceļa stacejis gaismys. Tī es tok jau beju! I nabeju vīna. Parkū mani vysu laiku kaids pavoda? I gryb puorsvīst puori dzelzceļa gaisa tyltam. Lai es īkrystu apakšā braucūšajā vagonā, lai es aizbrauktu paceli. Nazynomā vierzīnī iz nazynomu piļsātu. Pasaveru iz augšu. Tī nakts. Pasaveru iz leju. Tī munys bosuos, skrejūšuos kuojis. Pa asfaltu. Vyss nūlīts asfaltā. Tikai šur tur redzīs kūku saknis, kas saplāsušys palākuos īlys. Saplieš maņ pādys. Īaug papīžūs. Es sajiutu sovys saknis. Tepat. Zam asfalta. Tī ari ir Latgalis zeme. Kas jū apstruoduos? Kas apars volgū zemeiti? Visi brauc paceli. Visi meklej laimi. Kur jei sliepās. Bet tei ir sirds sajiuta. Sapyni palīk realitate, bet realitate palīk par sapynim. Tai ir. Nivīns nagryb dzeivuot realitati. Baidās saprast, ka ir kliudejīs. Baidās nūsaukt sevi par grieceigu i laimeigu vīnlaiceigi. Īneistu presi. Īneistu žurnalus. Īneistu POPCORN. Paļdis jim par patīseibys karikaturu.

Vīneibys laukumā pleivoj karūgi. Es skrīnu iz tīni. I maņ vaira nav kū elpuot. Es apsastuoju. I manī īīt mīrs. Taids, kaidu pasauļs navar īdūt. Tai klusai smaidūt es atsagrīžu Parādis 11. Aizmīgu. Varbyut reits atīs i itūreiz.