Dabeigti Austrumlatvejis regionaluo daudzfunkcionaluo centra – koncertzala Rēzeknē ākys korpusa byuvnīceibys dorbi, nūslāgumam tyvojās jumta saguma kai ari fasadu izbyuve. Dreiži īplānuots suokt īškejūs apdaris dorbus i akustiskū paneļu izstateišonu. Daudzfunckionaluos kulturys ākys izveidi īcarāts dabeigt leidz goda beigom, stuosta Rēzeknis dūmis eistynuotuo projekta vedeituoja Inese Haite. Projektu leidzfinansej piļsātys dūme, ERAF i vaļsts.

Tikom piļneibā izbyuvāti centra uorejī inženerteikli, suokts dorbs pi teritorejis lobīkuortuošonys, kas vysupyrma paradz pīvadceļu i ītvju īreikuošonu. Cikom ākys īšksīnys veiduoj bīza betona kuorta, bet turpmuokojūs mienešūs izjāāmumam „Arčers” byus juostruodoj pi kvalitativys akustikys īreikuošonys. Tikom Vuocejā jau izgatavej transformejomys greidys centram, bet Beļgejā tūp krāsli deļ obim centra koncertzalim, kurūs ir attīceigi 250 i 1000 sādvītu.

„Rēzekne faktiski byuvej pyrmū koncertzalu Latvejā, kas ir sarežgeits dorbs par tū, ka juonūdrūsynoj ari augstys provis akustika. Deļ tam gon projekta izstruodis gaitā, gon ari eistynuošanā projekta autori – SIA „Vizuālās modelēšanas studija”, sasadaroboj ar skandinavu akustikys profesionalim. Itū vaicuojumu stingri izrauga ari pasyuteituojs,” stuosta pošvaļdeibys izjāmuma „Austrumlatvejis koncertzals” vadeituoja Diāna Zirniņa.

„Paraleli vaicuojumim par koncertu i pasuokumu kluostu jaunajā centrā ni mozuok svareigi ir saimnīciska rakstura vaicuojumi, ākys iztureišona, komunālū i muokslinīciskū izdavumu segšona, talpu nūslūdzis plānuošana, nūmys leigumu sliegšona restoranam – kopejneicai, kinu teatrim”, stuosta D.Zirniņa. Jei cer, ka veiksmeigi turpynuosīs ar Kulturys ministreju īsuoktuos puorrunys, kas ļautu pīsaisteit papyldus resursus profesionālū muokslinīciskū programu nūdrūsynuojumam koncertzalā.

Juotgodynoj, ka Rēzekne ir pyrmuo piļsāta Latvejā, kurymā itūšaļt nu pošim pamatim teik calts jauns koncertzals aba Austrumlatvejis regionalais daudzfunkcionalais centrs. Tys ir vīns nu piļsātys drūsmeiguokajim realizejamim projektim. Paradzāts, ka centra byuvnīceibys dorbi nūsaslēgs ituo goda vosorā.

Regionam nūzeimeiguo kulturys byuve īcarāta kai daudzfunkcionals objekts, kurymā ir diveji akustiskī koncertzali (vīns nu tim byus pīmāruots kinu ruodeišonai), ustobys i apreikuojums seminaru i konferenču reikuošonai, ustobys profesionalajam orkestrim, Dzymtsarokstu nūdaļai, kopejneicai. Pošvaļdeiba izsvar, ka centra izbyuve paver īspiejis veicynuot investiceju pīsaisti Rēzeknis piļsātai. Latgalīšim daudzfunkcionalais koncertzals dūs īspieju baudeit dažaidus muokslinīciski augstvierteigus pasuocīņus.

Sagatavieja Diāna Zirniņa, Austrumlatvejis koncertzala vaļdis lūcekle

Kartenis nu Austrumlatvejis koncertzala publicitatis materialim