Nu 5. da 9. juļam Latvejā nūtiks Storptautiskais folklorys festivals „Baltica”, kurā pīsadaleis lobuokī folklorys kolektivi nu vysys Latvejis i jūs vydā lels skaits Latgolys regiona puorstuovu – vasali 70 kolektivi (folklorys kūpys, kapelys i etnografiskī ansambli).

Kotru godu folklorys festivalam teik izvālāta tema, caur kurū teik daudzynuotys latvyskuos dzeiviszinis vierteibys, nūdūts viestejums, kas sabīdreibā rūsynoj puordūmys par gareiguos dzeivis i atteisteibys vajadzeibu sovys tautys identitatis saglobuošonā. Ituo goda folklorys festivalā „Baltica” tema ir „Ceļš”.

Itymā godā festivals „Baltica” svietej 25 godu pastuoviešonys jubileju i pīduovoj eipaši plašu folklorys svātku programu. LaKuGa atzeimoj eipašuokus ci latgaliskuokus pasuokumus, iz kurim vārts nūīt, nūbraukt.

5. juļs 19:00 – 21:00 Lelajā Gildē, Reigā koncerts “Festivalam Baltica – 25”, pīsadola kolektivi, kas ir pīsadalejuši vysūs “Baltica” festivalūs Latvejā. Jūs vydā ari Latgolys regiona kolektivi.

6. juļs 12:00 – 20:00 Viermanis duorzs Nūvodu programys dažaiduos festivala sātuos, taipat nūtiks ari godatiergs. Pīsadola daudzi Latgolys kūpu i kolektivu. Vaira ITE

6. juļs 21:00 – 22:00 Festivala dalinīku guojīņs nu Viermanis duorza gar Breiveibys pīminekli, puor Akmiņa tyltu da AB dambim.

7. juļs 10:00 – 11:45 Sv. Marejis Magdalenys bazneica, Reigā Latgolys saļmu dzīduojumi. Byus vareiba redzēt gon video īrokstu nu 2009. goda saļmu dzīduošonys Rekovā, gon dzierdēt Medņevys etnografiskuo ansambļa i Saļmu dzīduotuoju grupys nu Ilziskolna pogosta dzīduošonu kluotīnē. Vaira ITE

7. juļs 15:00 – 17:00 Reigys Latvīšu bīdreibys lelajā zalā folklorys dzigu koncerts. Pyrmū reizi festivala pastuoviešonys viesturē sovu vītu festivala nūtikšonuos izapeļniejuse folklorys dziga. Koncertā pīsadaleis lobuokuos 8 folklorys dzigu grupys nu Latvejis, kurūs vydā ir ari Upeitis jaunīšu folklorys kūpa i Viļānu dzigu kūpa „Jurs” ar kapelu „Bumburneicys”. Vaira ITE

7. juļs 18:00 – 20:00 Viermanis duorzā Reigā, festivala sātys pļovā (Mozuo skotive) Mežvydu folklorys kūpys i Antoninys Myurneicys programa „Tū celeņu staiguodama!” Folklorys kūpa izdzīduos Latgolys putekļainajūs ceļūs sakruotū boguoteibu, kū ar mīlesteibu atvede nu sovom sātom. Vaira ITE

7. i 9. juļs eipašuo kinu programa kinu teatrūs „Splendid Palace” Reigā i „Vidzeme” Modyunē. 12:00 skateituojim īspieja nūsavērt ari divejis kinys par izcilim Latgolys cylvākim – Reiņa Kalnaeļļa eiskina „Guņs i muolu pavielnīks” (Uguns un mālu pavēlnieks) par pūdnīku Evaldu Vasiļevski i Raita Vulfa kina par Zīmeļlatgolys teicieju Margaritu Šakinu. Vaira ITE

8. juļs 11:00 – 18:00 Latgolys dīna Ikškilē – pīsadola Latgolys i cytu regionu kolektivi. Vaira skaiti ITE

8. juļs 10:00 – 13:00 Viermanis duorzs – bārnu i jaunīšu folklorys kūpu koncerti, kaitys i rūtalis. Pīsadola „Kūkleite”, „Ūzuleni”, „Mozī izvaltīši”, „Vīteri”. Vaira ITE

Taipat Latgolys regiona kolektivi pīsadaleis i cytūs koncertūs i nūtikšonuos.

Vysa informaceja par festivalu sātyslopā http://www.festivalbaltica.com