Aglyunys bazilikys Kora školys (ABKS) kors 22 dalinīku sastuovā vakar devēs iz Spaneju, Granadu, kab da 17. juļa pīsadaleitu XXXVII Vyspasauļs bārnu i jaunīšu koru Federacejis PUERI CANTORES kongresā – festivalā, informieja ABKS kora dirigente Ieva Lazdāne.

PUERI CANTORES reizi divejūs godūs puļcej korus nu vysa pasauļs. Ituos organizacejis devize: bārni dzīž mīram. Kongresu – festivalu laikā kori koncertej bazneicuos, dzīž kotrys vaļsts nacionalajā mišā, vairāki kuosi apsavīnoj Lyugšonuos par mīru. Koru sasatikšona nūsaslādz ar grandiozu, vysu koru dzīduotu mišu. Pīsadolūt koru federacejā PUERI CANTORES bārni i jaunīši boguotynoj sovu muzykalū pīredzi i īsapazeist ar cytu tautu kulturu.

Aglyunys bazilikys Kora školys kors PUERI CANTORES bīdrs ir nu 2004. goda.

Kongresā Granadā ABKS koram ir vairuokys svareigys izastuošonys:
12. julī – Nacionalais mišs Žālsirdeibys kapelā (Capilla de la Misericordia);
12. juļa vokorā – 3 koru koncerts Sv. Jeronima bazneicā (Igesia de San Jerónimo) kūpā ar korim nu Šveicis i Vuocejis;
13. julī Mīra lyugšona kūpā ar korim nu 7 vaļstim.

Kūpā ar vysim kongresa daleibys korim:
11. julī – Atkluošonys pasuokums;
15. julī – Svineigais kongresa nūslāguma mišs.

Breivajā laikā dzīduotuoji brauks ekskursejuos, kab īsapazeitu ar itū sovpateigū spaņu piļsātu. Kora dalinīki dzeivuos spaņu saimēs. Kori pavoda bazilikys prīsters Jurs Zarāns i Latgolys koru federacejis PUERI CANTORES sekretare Inese Stūre.

Piec kongresa nūslāguma kors divejis dīnys byus Spanejis golvyspiļsātā Madridē. Dzīduotuoji pasasoka Latvejis viestnīceibys Madridē darbinīkam Andrejam Kovaļovam par paleidzeibu braucīņa sekmeigai nūrisei. Taipat lela pateiceiba atbaļsteituojim – Leivuona nūvoda atteisteibys bīdreibai, Aglyunys nūvoda dūmei, Aglyunys bazilikai, ilggadejam školys draugam Juoņam Klaužam, kai ari Juoņam Dūklava

Karteņā – Aglyunys bazilikys Kora školys kors, publicitatis karteņa