Šudiņ, 20. julī 20:00 Leivuonā suoksīs leluokī piļsātys svātku pasuokumi, kuru laikā vīna nu eipašajom nūtikšanom byus vītejuo lapnuma – kapelys „Jūlijs” 25 godu jubileja koncerts. Pyrma koncerta nu 19:00 sasadzīduošona ar kapelu i Latvejis Šlageraptaujis vadeituoju Gunti Skrasteņu.

Kapela „Jūlijs” rodusīs pyrma 25 godu, kod kapelys dybynuotuojs i vadeituojs Jūlijs Stikuts kūpā ar sīvu Helenu suokuši muzeicēt dažaidūs gūdūs, vysu vaira tī bejuši kuozys. Kapelys repertuaram nu suoku beja pošu vuoktys dzīsis i ziņgis i pošu reizi taidu dzīšmu ir jau ap ostoni symti. Repertuarā gon naasūt tik latvīšu dzīsmis, nu ari pa kaidai dzīsmei pūļu i krīvu volūdā.

Pa itim godim kapela spieliejuse na viņ Latvejis vītuos, nu byuts ari cytur. Spālāts vysūs deveņdesmytūs godu festivalūs „Baltica”, Rēzeknis muzykys festivalā, daudzi Reigā, dažaidūs konkursūs kai „Latvju ziņģe” i cytūs, taipat puorstuoviejuši Latveju Gdaņskys folklorys festivalā i niu ar cīši lobom sekmem pīsadola Latvejis Šlageraptaujā.

Sovys pastuoviešonys laikā kapela izdevuse septenis audio kasetis, nu kurūs pyrmuo „Rudzu maize” izguojuse 1993. godā, i pīcus albumus kompaktdiska formatā, nu itys jubileja koncerts byus eipašs ari ar grupys jaunuokuo albuma „Gadi virtenē krājas” prezentaceju, kurā atrūnomys 22 dzīsmis – gon nu kapelys „Jūlijs” „zalta fonda”, gon taidys, kas nav dzierdātys nivīnā īrokstā.

„Jūlija” jubileja koncertā gostūs byus atbraukuši ari kapelys draugi i sveicieji – Jūlija Stikuta bejušī audziekni Pļaveņu kapela, Lubuonys kapela, šlagermuzykys duets „Inga i Normunds”, „Andrejs i draugi” nu Cēsim, Lubuonys tautys dzigu ansamblis „Varavīksne”, Leivuona dzigu ansamblis „Rūžeņa”, bet piec koncerta doncuošona ar Gunta Skrasteņa grupu „No pusvārda”.

Pošu šaļti kapelys sastuovā ir septeni muzykanti – Jūlijs i Helena Stikuti, skripku spielej Vineta Vaivode, ceitaru Gita Jākobsone, basgitaru Helmuts Jauja, trompetē iz meju pyuš Edmunds Jauja, Oskars Grīgs ci Imants Rusiņš, pi bungu Edgars Podskočiks i pa reizei ar vysim kūpā saspieļoj ai Jūlija i Helenys mozdāls Ivo Pētersons.

Juoatzeimoj, ka Leivuona kulturys centra Mozajā zalā apsaverama ari izstuode „Jūlijam 25”, kurā var īsapazeit ar grupys dzīduotom dzīsmem, spālātim instrumentim, koncertu tārpim, taipat apsaverama kuozu medaļu kolekceja i cytys ar kapelys viesturi i darbeibu saisteitys lītys.

Šudiņdīna kapelai „Jūlijs” ir eipaša ar vēļ kaidu nūtikšonu – koncerta laikā kapelys vadeituojs Jūlijs Stikuts sajims Leivuona Gūda pylsūņa apbolvuojumu.

Vaira par kapelu skaiti gazetys “Latvijas Avīze” slejuos ITE

Karteņa nu kapelys arhiva

Leivuona piļsātys svātku programa