Reitu, 26. julī Vileks nūvoda Škilbanu pogosta Balkanūs suoksīs latgalīšu rokstu volūdys i kulturviesturis seminars „Roksti!”, kurā da 29. juļam pīsadaleis 15 interesenti nu dažaidu Latvejis vītu, ar mierki izlobuot latgalīšu rokstu volūdys zynuošonys, izzynuot Latgolys kulturviesturi i papyldynuot prasmis rokstu par regiona kulturys dzeivi sagataveišonā regionalajim i vaļsts medejim.

Seminarā „Roksti!” pīsadaleis biblioteku, pošvaļdeibu, navalstiskūs organizaceju, medeju darbinīki, studenti, školuotuoji i latgalīšu rokstu volūdys interesenti nu Ludzys, Vileks, Kuorsovys, Daugovpiļs, Rēzeknis, Varakļuonu, Preiļu i c. nūvodim i vītom.

Seminarā kotru dīnu paradzātys latgalīšu rokstu volūdys nūdarbeibys, kab īsavuiceitu ci izlobuotu myusdīnu latgalīšu rokstu volūdys zynuošonys, taipat paradzātys nūdarbeibys par Latgolys kulturviesturi i zynuošonu boguotynuošonai par rokstu sagataveišonu medejim. Lektoru vydā ir „Latgolys fotografu bīdreibys” vadeituojs Igors Pličs, žurnala „Ir” žurnaliste Anita Brauna, Bolvu Centraluos bibliotekys vadeituoja Ruta Cibule, publiciste Ilze Sperga, filologe Muora Mortuzāne-Muravska, Upeitis bibliotekys vadeituoja, Ontona Slišāna meita Mārīte Slišāne.

Piec intensiva dorba dīnys nūdarbeibuos seminara dalinīkus gaida latgaliska kulturys programa tematiskajūs vokorūs. 26. julī – Annys dīnā – latgaliskuos dzejis i folklorys vokors ar folklorys kūpu „Rekavas dzintars”, 27. julī latgalīšu teatra vokors ar Baļtinovys amateatri „Palādas” i 28. julī muzykalais vokors ar grupys „Napruots” i Upeitis jaunīšu folklorys kūpys daleibnīkim. Seminara „Roksti!” laikā daleibnīkim byus na viņ juosavuica, nu ari iz vītys juogatavej roksti, juotaisa seminara dīnysgruomotys i aktivi juoīsasaista vysuos nūtikšonuos. Seminara nūrisei varēs sekuot ari “Latgalīšu kulturys gazetā”.

Latgalīšu rokstu volūdys seminaru „Roksti!” reikoj bīdreiba „Latgolys Studentu centrs” i latgalīšu kulturys gazeta www.lakuga.lv ar LR Kulturys ministrejis i Vaļsts Kulturkapitala fonda Latgolys kulturys programys atbolstu. Seminaru atbolsta ari vītejī Latgolys izjāmumi – A/S „Balvu maiznieks”, SIA „Adugs” i A/S „Latgales piens”.

Seminara organizātuoji car, ka dabuotuos zynuošonys par latgalīšu rokstu volūdu, Latgolys kulturviesturi i cytom temom daleibnīkim cīši nūderēs ari iz prīšku, izmontojūt kasdīnys dorbā ci aktivitatēs.

Organizej:

Finansiali atbolsta: 

Atbolsta: