Reitu īsasuoks Rēzeknis piļsātys svāki treju dīnu garumā
Jau reitu ar izstuodis „Pasauļa latgalīšu muoksla” atkluošonu Latgolys Kulturviesturis muzejā, suoksīs Rēzeknis piļsātys svātki treju dīnu garumā. Svātku devize itymā godā ir „Rēzekne vīnoj!”
3. augusts byus ar devizi „Rēzekne vīnoj jaunīšus”. Itymā dīnā 15:00 Latgolys Kulturviesturis muzeja tiks atkluotys vasalys divejis izstuodis „Pasauļa latgalīšu muoksla” i „Latgolys dvēselis tulkam Mikeļam Bukšam – 100” kai ari byus kapelys „Dziga” jaunuo albuma „Gotovs” īdzīduošona. Ituos nūtikšonys reizē ir ari 3. Pasauļa latgalīšu saīta suokys. Piļsātys svātku suoku akordi izskanēs ari 18:00 Kulturys i atpyutys parkā IX Storptautiskuo akordeonistu plenera „Rēzekne 2012” dalinīku izpiļdejumā. 19:00 Rēzeknis Kulturys nomā byus ilgi gaideitais konkurss „Mis i Misters Rēzekne 2012”, nu 20:00 Kulturys i atpyutys parka estradē byus jaunīšu estradis muzykys i doncuošonys konkurss. Dalinīku vydā byus ari LaKuGys skaiteituojim jau pazeistamuo post-folka grupa „Rikši” i dzīdūšī bruoli Punculi nu dzīduošajom saimem. 22:30 paradzāts svineigais konkursa „Mis i Misters Rēzekne 2012” dalinīku izguojīņs, piec kuruo saguojušūs prīcēs Lauris Reiniks i piečuok koncertbalu spēlēs grupys „Forte” i „Avtoportret”.
4. augusts byus veļteits tam, kab vīnuotu dažaidys tauteibys. Nu reita 10:00 Latgolys īlā pi Nacionalū bīdreibu kulturys noma byus iz festivala atbraukušūs krīvu, boltkrīvu, puoļu i ebreju kolektivu koncerts. Tymā pat laikā Raiņa īlys garumā nu parka da 18. novembra īlā byus piļsātys svātku nūtikšonys ar tierdzenim, koncertim, īlu basketbolu i jaunīšu aktivitatem. Vokora šaļtī 19:00 Kulturys i atpyutys parkā byus Nacionalū kulturu festivala dižkoncerts, kurā pīsadaleis ari Rēzeknis „Dzigys” doncuotuoji i post-folka grupa „Rikši”.
5. augustā Rēzekne vīnuos paaudzis i vysom paaudzem vysu vaira vīnojūšais faktors ir gareigums. 12:00 byus svātki Mišs Rēzeknis Jezus Sirds katedralē, nu 15:00 ar latgalīšu komponistu dorbu koncertu nūsaslēgs Latgolys vargaņu dīnys. Vokorā 20:00 Kulturys i atpyutys parka estradē byus nūsaverama Reigys Muzykaluo teatra 7 breivdobys komedeja „Teic, kur zeme skaistākā”, kurys muzykalais producents ir Atis Auzāns.
Informaceja nu Rēzeknis piļsātys sātyslopys
