31. julijā pabeidze Daugavpiļs – Rēzeknes elektreibas līnijas izbyuvi un Rēzekni pīslēdze Daugavpiļs elektreibas centrālei. Atzeimejūt šō lelō dorba nūslāgumu un draudzeibas rūku vīnōšonu storp Daugavpili un Rēzekni, obu Latgolas metropoļu vadeitōji nu svineibu atklōšonas vītas Daugavpiš izbrauce uz Rēzekni, kur nūtyka svieneibu golvonō daļa. Pa ceļam apskatēja moderni izbyuvātūs transformatorus un elektreibas stobu īreici Maltā. Rēzeknē pi piļsātas vaļdes noma vīsus ar maršu sveice Rēzeknes kōjn. pulka orkestrs. Pēc eisas atpyutas, svineibu daleibnīki devēs uz transformatora staciju 15. maija īlā. Pi īejas beja calti gūda vōrti ar uztrokstu „Daugavpiļs – Rēzekne vīnōta”. Vēsturiskā breidī beja klōt ari daudzi Rēzeknes īdzeivōtōji.

Elektreibas līniju atklōjūt, Daugavpiļs piļs. golva J. Volonts teice runu, storp cytu nūrōdūt, ka ar šū dīnu īsōkta Latgolas elektrofikācija daudz plašōkūs apmārūs kai leidz šam. Daugavpiļs elektreibu tagad varēs izmontōt ari apkōrtejī daudzī lauksaimnīki. Līnijas byuve uzsōkta 28. maijā un tōs garums 90 klm. Byuvē izlītōti 1700 stabu un tei izmoksōjuse 345.000 ls. šis pabeigtais dorbs ir jauns līcinīks Latvijas saimnīciskai atteisteibai un pauž slavu myusu Vodūņam.

Pēc vaļsts himnas, Rēzeknes piļs. golva M. Priedulāns, sovā runā pastreipōja, ka vysi Rēzeknes īdzeivōtōji par jaunū pasōkumu, ir sajūsmynōti. Rēzekne tagad kļyus gaišōka. Līsma, kas šūdiņ īsadegs, myužam atgōdynuos tautas Vodūņa pamatdūmu: tikai vīnōti varam sasnēgt spraustūs mērkus. Tad pi transformātora spuldzēs uzlīsmōja jaunō elektriskō strōva un vysim par tū beja prīks. Svineibu daleibnīki dūdynōja vaļsts prezidentu Dr. K. Ulmani un nūsyutēja viņam sekušu telegramu: –

„Šodien, atklādami jaunizbūvēto Daugavpils – Rēzeknes 90 kilometrus gaŗo elektrības līniju, Dagavpils un Rēzeknes pilsētu pašvaldības, kopā ar vietējiem iedzīvotājiem, priecādamies par raženā darba rezultātiem, sirsnīgi pateicās Jums, augsti godātais Prezidenta kungs, kas radījis šo jauno, brīnišķo vienības un celtniecības laikmetu, kuŗā vienotais darbs tik viegli un sekmīgi raisās.

Spodri un spēcīgi mirdz elektrība pilsētas ielās un namos un tikpat spēcīgi, spodri un karsti mirdz un pukst mūsu sirdis uzticībā un paļāvībā Jums, mūsu mīļam, dižam un varenam tautas Vadonim.”

Apsveikumus nūsyutēja ari kara ministram gen. J. Balodim, īkšlītu ministram V. Gulbim un finansu ministram L. Ēkim.

Rēzeknes pīslēgšona Daugavpiļs elektriskai spākstacijai ir pyrmais mēginōjums Latgolas eletrofikacijai. Gar obom pusem Daugavpiļs – Rēzeknes šosejas atsarūnūšom pašvaļdeibu īstōdem, sabīdriskom organizacijom, bazneicom, školom un apkōrtejīm zemnīkim tagad ir dūta īspēja īviļkt sovōs īstōdēs un mītnēs elektriskū strōvu un gaismu. Lai lobas sekmes daugavpilīšim turpynōt svēteigū pasōkumu Krustpiļs, Krōslovas un cytūs vērzīņūs.

Olūts: Jaunais Vōrds. – Reiga, 1937. g. 5. augustā. – Nr. 29. – 29. pl.