18. augustā Bolvu nūvoda īdzeivuotuoji i gosti svieteis Bolvu nūvoda svātkus „Atvērsim sirdis”.

Itūgod nūvoda svātki tiks svieteiti plašuok kai cytus godus, jo dažaidi pasuokumi vysūs Bolvu nūvoda pogostūs byus vasalu nedeli nu 11. da 18. augusta.

Jau reitu nūvoda svātku atkluošona i pyrmī pasuokumi byus Tilžys i Vactilžys pogostūs. Tilžā byus svātku atkluošona, zyrgu skrīšonuos saceņseibys i bals ar Juri Ostrovski nu grupys „Patrioti.lg”, nu Vactilžā byus tautys muzykantu saīts „Muzykantu dzierksts”. Svātdiņ svātku nūtikšonys Bierzpilī – Sv. Mišs i gareiguos muzykys koncerts.

Nūvoda svātku nedelis moto ir „Atdareisim sirds!”. Vysi nūvoda īdzeivuotuoji i gosti teik aicynuoti byut aktivim i izmontuot īspieju īpazeit Bolvu nūvodu, apmeklejūt piec īspiejis vaira svātku pasuokumu. Nu 1. augusta Bolvu Kulturys i atpyutys centrā i pi vysu nūvoda pogostu kulturys pasuokumu organizatorim ir īspiejams sajimt „Nūvoda svātku nedelis pasuokumu apmaklātuoju karteiti”. Par kotru apmaklātū svātku pasuokumu karteitē varēs dabuot attīceiguo pogosta zeimūgu. 18. augustā nu 10:00 – 16:00 aizpiļdeituos karteitis juoīsnīdz Bolvu piļsātys parkā informacejis stendā. Čakluokī pasuokumu apmaklātuoji sajims bolvys.

Svātku kulminaceja byus 18. augustā, kod dažaidi pasuokumi vysys dīnys garumā byus Bolvu piļsātys parkā – gon nūtikšonys bārnim, gon tautys muzykys koncerts, talantu konkurss, svātku guojīņs i vokorā muziķa Laura Reinika koncerts i bals ar grupu „Vēja runa”.