Leivuona Latgolys muokslys i amatnīceibys centra izstuožu zalā da 8. septembram apsaverama četru Latgolys muokslenīču – Ilzis Griezānis, Agrys Ritinis, Vijis Stupānis i Vēsmys Ušpelis kūpeiga gleznu izstuode „Četri vieji”.

Izstuode „Četri vieji” prezentej četru muokslenīču dorbus, kuri niu kai topuši vīnā nu breivdobys plenerim Mozirbē. Vysom četrom muokslineicom ir daudzi kūpeiga, pīmāram, dzeivoj i sovā radūšajā darbeibā puorstuov vīnu konkretu Latvejis regionu – Latgolu. Absolviejušys Rēzeknis muokslys i dizaina vydsškolu, kai ari Latvejis Muokslys Akademejis Latgolys filiali. Muokslineicys ar sovim dorbim pīsadola kūpeigūs plenerūs, nu kurim pyrmais tyka aizvadeits Rēzeknis nūvoda „Akmineišūs” – pūdnīka Evalda Vasilevska darbneicā. Itam pleneram sekuoja daudzi cyti kūpeigi radūši pleneri dažaiduos Latvejis vītuos i piļsātuos, bet 2011. godā muokslineicys aizvadeja radūšu nedeļu Suomejā.

Muokslineiču dorbūs daudzys kūpeiguos īzeimis mejuos ar kotrys muokslineicys personiskū i profesionalū individualitati. Muokslineica Ilze Griezāne vysu cieškuok gleznoj ainovys, reita, dīnys i vokora jutūni, saulis spaitim veitys tuolis i laukus, pīkolnis, mežus i iudiņus. Muokslineicys Agrys Ritinis dorbūs teik attāluoti dobys motivi: kūki, zīdi, muokuli – vyss kūpā i atseviški. Muokslineica izmontoj lelus kruosu laukumus, kuri kolpoj par fonu fakturys gaismai. Iz muokslineicys Vijis Stupānis audakla izplaukst pučis, nu sudorbrainim da suleigim, kruosu pīpiļdeitim trīpīnim. Nu koloritajai muokslineicai Vēsmai Ušpelei par gleznu motivim kolpoj portrets. Portreta kompozicejis centrā var byut kaida sīvīšu rūta, motu sprādze ci kaida cyta nanūzeimeiga detaļa. Kūpumā teik izmontuotys suleigys i suotnys kruosys, dyžan lelū trīpīņu izpiļdejumā.

Izstuode apsaverama Leivuonā Latgolys muokslys i amatnīceibys centrā, Dūmis īlā 1. Centra dorba laiks augustā: O. – P. 9:00 – 18:00, S. 10:00 – 16:00, Sv. 11:00 – 15:00, P. – breivs, septembrī: O. – P. 9:00 – 18:00, S. 10:00 – 16:00, Sv., P. – breivs.

Informaceju sagatavieja:

Inita Paegle,
LMAC kulturys turisma organizatore

Karteņā – muokslineicys dorbā, LMAC publicitatis kartenis