1.septembrī 11.00 stuņdēs Rēzeknis nūvoda Drycanu pogosta puorvaļde i Drycanu vydsškolys kolektivs īlyudz iz SPORTA ZALA atdareišonys svātkim.

Pasuocīnī teik aicynuoti pīsadaleit LR Izgleiteibys i zynuotnis ministrs Roberts Ķīlis i LR Zemkūpeibys ministre Laimdota Straujuma, kai ari Rēzeknis nūvoda pašvaļdeibys aministraceja i dūmis deputati, Drycanu pogosta puorvaļdis puorstuovi, Drycanu vydškolys pedgogi, školāni, vacuoki, absolventi, bejušī darbinīki i pogosta dzievuotuoji. Atdareišonys svātkūs kluotasūšūs prīcēs školys i pogosta pašdarbnīku kolektivi, kai ari sagaidams kaids puorsteigums nu školys absolventim. Sporta zala ”īspēliešonys” laikā paradzāti svineigī bumbys metīni peitinē.

Sporta zala byuvnīceibu dareja pylnsabīdreiba „Latgales būve” nu 2010.goda 1.juņa da 2012. goda 30.apreļam. Maja suokumā 860 kvadratmetrus lelīs kuorms tyka nūdūts ekspluatacejā. Projekta kūpejuo summa Ls 494 093, nu kurys 90% finansieja Eiropys Lauksaimnīceibys fonds lauku atteisteibai (ELFLA), 10% Rēzeknis nūvoda pašvaldeiba i Rēzeknis nūvoda pašvaļdeibys Drycanu pogosta puorvaļde.

Projekta mierks beja izbyuvēt jaunu myusdīneigu sporta zalu Drycanu pogostā, paaugstynūt Drycanu vydsškolys daviļceibu i veicynuot fiziskū aktivitašu i sporta kuļturys atteisteibu nūvodā.

Byusat meilai gaideiti Drycanu vydsškolys SPORTA ZALA atdareišonys svātkūs!