31. augustā 15:00 Latgolys Kulturviesturis muzejā tiks atkluota rēzeknītis Karīnys Ludbuoržys gleznu i zeimiejumu izstuode „Pakuopīņs” (Pakāpiens), kurā 28 dorbūs muokslineica atkluoj sova profesionaluo izaugsmis ceļa pakuopīņus.

Karīna Ludbuorža ir dzymuse 1990. goda 17. oktobrī Rēzeknē. Nu 1997. da 2003. godam vuicejusīs Rēzeknis 1. vydsškolā. 2006. godā beiguse Rēzeknis Vaļsts gimnazeju. Vuiceibys turpynuojuse Rēzeknis Muokslys i dizaina vydsškolā, kuru beiduse 2010. godā. Kluot pi muokslys izgleiteibys vuicejusīs ari akordeona spēlēšonu Zanis Ludbuoržys Muzykys školā.

Itūšaļt studej gleznīceibu I. Repina vuordā sauktajā Sanktpīterburgys Muokslys akademejā. Nu jau Rēzeknis Muokslys i dizaina vydsškolys laikā Karīna ir pīsadalejuse vizuali plastiskuos muokslys nūdalis audziekņu dorbu izstuodēs školys telpuos. Itūvosor pīsadalejuse Sanktpīterburgys Muokslys akademejis studentu plenera dorbu izstuodis Puškina kolnu Kulturys nomā i studentu lobuokūs dorbu goda izsuodē Pīterburgys Muokslys akademejis telpuos.

Jaunuo muokslineica taisejuse emblemys i afišys Zanis Ludbuoržys Muzykys školys reikuotajim storptautyskajim akordeonistu plenerim „Rēzekne 2010”, „Rēzekne 2011” i „Rēzekne 2012”. Paraudzejuse rūku vitražys imitacejis darynuošonā, taisūt kompoziceju „Zači”. 2011. goda septembrī sareikuojuse personalizstuodi Latvejis Muokslys akademejis Latgolys filialis telpuos.

Itei Karīnys Ludbuoržys dorbu izstuode „Pakuopīņs” pošai autorei ir svareiga sasatikšona ar draugim i školuotuojim dzymtajā piļsātā Rēzeknē, paruodūt da ituo padareitū vierzeibā iz prīšku pa pakuopīnim preteimā profesionalajai piļneibai. Izstuodē apsaverami K. Ludbuoržys zeimiešonys i gleznuošonys dorbi, tematiskuos kompozicejis, vosorys plenera laikā zeimietuos dobys ainovys. Izstuode byus apsaverama da 22. septembram.

Sagatavieja Inese Dundure, Latgolys Kulturviesturis muzejs

Karteņuos – muokslineica Karīna Ludbuorža i juos dorbi