1. septembrī 12:00 Leiksnys katuoļu bazneicā byus bazneicys 100. godadīnai veļteita diska prezentacejis koncerts.

Diskā īmyužynuots Leiksnys vargaņu skaniejums. Īrokstā pīsadaleja saksofonists Rihards Novickis i varganiste Renāte Stivreņa, kas pīsadaleis ari 1. septembra koncertā. Diskā ir ari R. Stivrenis komponātais vargaņu cyklys „Ostonis kolna sveiteibys”, kas pyrma puora godu radeits pa lelam taišni pi Leiksnys vargaņu. Koncertā skanēs gon lelūs komponistu muzyka – Johana Sebastiana Baha, Sergeja Rahmaninova i Petra Ebena kompozicejis, gon ari klauseituojim par prīcu – improvizacejis par dažiadu laiku i stylu temu.

Bazneicys viesture Leiksnā aizasuokuse 1798. godā leidza ar Leiksnys centra izaveiduošonu, kod ar grafu Plateru – Zibergu leidzeklim tyka izcalta bazneica. Tei gon teik nūjaukta 1909. – 1912. godā, kod teik calta jaunuo bazneica, kas Leiksnā ir vēļ arviņ.

1905. godā par pravestu Leiksnys draudzē teik īcalts Rēzeknē dzymušais Pīterpišl gareigū akademeju beigušais Antonejs Springovičs. Taišni Springovičam beja ideja par jaunys bazneicys ceļšonu. 1909. goda 27. janvarī Leiksnys ļauds reikuoja lelu saīšonu i īvēlieja komitetu, kurā beja pravests, vītejī grafi i pīcei zemnīki. Bazneicys ceļšonai naudu zīduoja Leiksnys, Vabalis i Kirupis grafi. Taipat poši Leiksnys ļauds beja klaušu nesieji i naudys nūdavu moksuotuoji.

Bazneica tyka pasvieteita 1913. goda 5. oktobrī Rožoncovys svātkūs.

Leiksnys bazneica ir izcalta pogosta augstuokajā vītā – Vaikuļānu cīmā pusūtra kilometra nu Daugovys krosta. Tei calta neogotiskā stylā. Pyrmajā pasauļa karā bazneica cīte artilerejis apšaudēs, nu rodušūs būjuojumus salabuoja divdesmytajūs godūs.

Bazneicys lelajā altarī ir Jezus Sirds statuja – vyssvātuokuos Jezus Sirds gūdam ari ir veļteita Leiksnys baznieca.

Vaira par bazneicys viesturi skaiti ITE 

Karteņā – Leiksnys bazneica, foto Julita Kluša