Itū rudiņ Latvejis Radejis 1. programā byus jauns raidejums latgaliski. Paradzāts, ka raidejums izīs reizi nedeļā i byus dzieržams i atkuortojumā.

Praseiba par raidejumu latgaliski nacionaluos radejis stacejis pyrmajā programā izskaniejuse dažaiduos latgalīšu sasatikšonys reizēs. Niu jei tiks eistynuota, pasasokūt sabīdryskuo pasyutejuma nūsacejumim, kas ir vīns nu punktu jaunajā Nacionalūs elektroniskūs plašsazinis leidzekļu padūmis (NEPLP) strategejā 2012. – 2017. godam.

Itū šaļti vēļ teik dūmuots par raidejuma saturu i formatu, deļtuo sovys idejis izsaceit aicynuoti ari Lakugys skaiteituoji, raidejuma potencialī klauseituoji – kū jius grybātu dzierdēt jaunajā raidejumā i kas byutu aktuali Latgolai i latgalīšim. Jaunais raidejums ir pošu latgalīšu īspieja sataiseit interesnu, aktualu laidīni kai deļ seve pošu, tai ari deļ cytu, lai jī izzynoj, kas ir latgalīši i kas nūteik latgaliskajā Latgolā ci latgaliskajā pasaulī cytur. Īsacejumus var raksteit komentarūs zam ituo roksta, dūmu meitā ci syuteit e-postu iz info@lakuga.lv.

Reizē jau niu teik maklāti ari raidejuma īspiejamī vadeituoji i korespondenti Reigā i Latgolys regionā. Aicynuoti atsasaukt ļauds, kam ir idejis, kai padareit interesnu latgaliskū i gribiešona pīsadaleit raidejuma taiseišonā, tai īgiustūt jaunys prasmis i zynuošonys. Latvejis Radeja pīduovoj īspiejis ari apvuiceibai (skona apstruodis programys, volūda, runa i tml.). Praseibys: interese par latgaliskū i latgalīšu volūdys prasme. Žurnalistikys zynuošonys (var byut studeju procesā), sižetu sagataviešonys i raidejumu vadeišonys pīredze varātu byut kai prīškrūceiba. Dasacejumus var syuteit iz info@lakuga.lv.