Rudiņs nas jaunu ražu na tikai pogrobā, orūdūs i soltaunīkā, a taipoš i latgalīšu kulturā. Nūsaslāguse jaunuos latgalīšu spēlis kinys „Vīna vosora deļ vysu” fiļmiešona. Prīškā gon vēļ lels dorba pūsms – kinys montiešona, muzyka i cyti puorsteigumi, kū raudzeis saguoduot kinys komanda. Sovu pyrmizruodi jaunuo latgalīšu kina pīdzeivuos cytagods.

Kinys režisors ir Edgars Blinovs (Latgolys entuziastu grupa BILDIS), vaira zynoms kai kinys „Latgolys laikadečs” (2011) režisors. Fiļmiešona vysys vosorys garumā nūtyka Rēzeknis nūvoda Ūzulainis pogosta Pauleņūs, Ruņču sātā.

Režisors E. Blinovs soka paļdis akterim i sovai talanteigajai i profesionalajai komandai: „Komandys perfektais darbs ļuove maņ uzjimt kinu par myusu dīnu Latgolu, nasaverūt iz vysaidu sarežgiejumu fiļmiešonys laikā.”

Lūmys tāluoja kai Latgolā jau zynomi cylvāki, tai pavysam jauni talanti, tai īgiustūt īspieju paraudzeit sovu spāku aktera muokslā. Golvonūs lūmu tāluotuoji ir Daila Ekimāne, Diāna Bernāne, Ilmārs Dreļs, Andrejs Rudzinskis i Santa Seržante.

Kai atzeist fiļmiešonys komanda, itei byus tei laimeiguo vosora, kam nabyus lamts pagaist – daļa juos paliks kadrūs, atmiņuos i nūtykumūs. Kas zyna, kas ir vosora laika ritiejumā i kas vīna cylvāka myužā. A kas ir vosora kinys komandai – dorba grupai i aktīrim – vīnys atbiļdis nabyus. Emocejis, process i īspaidi nav izmierejami, viņ izdzeivojami. Padareitais ir izmierejams viņ dorba rezultatā, pat nasaverūt iz laika apstuokļu, kurī na vysod beja gona lobi paradzātuos epizodis fiļmiešonai.

Kina „Vīna vosora deļ vysu” ir myusu dīnu drama, kas stuosta par vīnkuoršu latgalīšu saimi, taidu pošu kai daudzejis niu Latgolā i Latvejā. Kinys varūņus skuoruse itam laikam tik īrostuo i tik suopeiguo problema – izceļuošona iz uorzemem, aizīšona nu dzymtuos sātys i saimis. Nazkod tyvu cylvāku dzeivis vaira nikod naīs pa vacam, atškierteibys laikā kotram ir izaveiduojuse sova pīredze i dzymušys sovys vajadzeibys i sovys nuokūtnis cereibys. Kinys centrā ir palicieju i aizbraucieju sasatikšona Latgolys sātā, tei ir atškireigu pīredžu i vajadzeibu sasadūršona. Kotram ir sova dzeive i sovs redzīņs iz lītom, tok, kab varātu sadzeivuot, ir juopījem cytu cylvāku izvēlis i tys par reizis nimoz nav tik vīglai i izdorams. Kotram sova dzeive, tik vosora deļ vysu vīna – laiks, kod raudzeit sasatikt i naizaškiert iz myužu.

Ituo projekta laikā nacionalā i storptautyskā leidzīnī teik dagrīzta viereiba myusu dīnu situacejai Latgolā, raugūt pīduovuot sovu redziejumu i viertiejumu iz procesim, kas itūšaļt nūteik tipiskā latgalīšu sātā i saimē, teik ruodeita Latgolys kulturvide i tradicejis, latgalīšu volūda i cylvāki.

Kinys tapšonu atbolsta Vaļsts Kulturkapitala fonds, Rēzeknis nūvoda dūme, Rēzeknis piļsātys dūme,  Rēzeknis piļsātys dūmis Socialuo puorvaļde, „Youth in Action”, SIA „Microlines”, Bolvu nūvoda dūme, Latgolys Regionaluo televizeja, Rēzeknis Augstškola, SIA „ZEIZE”, A/S „Rīgas Dzirnavnieks”, SIA „ADUGS”, “Cido Grupa”, parfimerejis veikals “Perfume du Monde”, SIA „EV Holding”, SIA „JUVAL”, SIA „Teadem”, bīdreiba “Volūdu i kulturys centrs „Pasaule mūsu mājās””.

Latgolys Regionaluos televizejis sižets par kinys „Vīna vosora deļ vysu” tapšonu.

Vaira par kinys tapšonu skaiti Skaidreitis Svikšys rokstu “Vysim tik vīna vosora. Deļ vysu i vysa”, kas portalā Lakuga.lv īlykts ituo goda 25. junī sadarbeibā ar laikrokstu “Vietējā Avīze”.