17. septembrī, sekojūt Dzejis dīnu tradicejai Latvejā, sovu Dzejis dīnu svieteja ari Drycanu vydsškola.

Drycanūs dzeju i par dzeju runuoja latgaliski, ari muzykys rytmā i video veidūlā, jo vydsškolā gasteja jaunuo, atraktivuo ailineica Zaiga Lāce i latgalīšu melanholiskais rokmuzikis Sovvaļnīks aba Ingars Gusāns.

Zaigys nūpītnuo i dzili subjektivuo dzeja mejuos ar Sovvaļnīka skumajom dzīsmem. Klausūtīs i izdūdūt vaicuojumus, saguojušī izzynuoja, kaids ir interess par muziki puornūvodūs, juo guodus par talanteigajim Latgolys dzīduotuojim i grupom, kurys Dīvam žāļ na cīši atskaņoj Latvejis radeju stacejis. Ailineica Zaiga izsviere sovu latgaliskū dūmuošonys lauku, atsazyna nadrūšeibā itūšaļt izdūt dzejis kruojumu, nu cikom naatkluoja sovu īcarātū pseidonimu.

Sasatikšona saguoja cīši sirsneiga, atkluota i obpuseji pateikama. Gosti atzyna, ka reiši kod saīt tik jauks pasuocīņs kūpā ar školānim, kuru pat nasagryb beigt.

Golā vysi nūsavēre Sovvaļnīka dzīsmis „Latgola” video verseju, kuru taisejuse Latgolys entuziastu grupa „Bildis”. Drycanīši prīcojās i lepojās, ka itymā klipā vīnu nu golvanajom lūmom spielej Drycanu vydsškolys 12. klasis školneica Kristīne Bautre.

Gunta Kazuševa

Drycanu školys MOBILAIS REPORTERS – interveja ar Sovvaļnīku. Intervej – Viktoreja, operators – Ināra Orlova

Karteņuos – Dzejis dīna Drycanu vydsškolā, foto Silvija Laizāne