Leidza ar jaunuo školys i studeju goda atīšonu, studentim speid i pasaruoda jaunys īspiejis. Itūreiz – taidai kai vadynuošonai paraudzeit koč kū jaunu, stuosts par latgalīša celim Pūlejā ERASMUS* laikā.

Sapazeisim! Mani sauc Agnese! Studente – Daugovpiļs Universitatē (iz prīšku – DU)  dabuots bakalaura grāds sociologejā, niu turpynoju studejis magistranturā. Latgalīte! Daudzpuseiga, apzineigai, centeiga, naatlaideiga… Lobuokuo eipašeiba – speiteiba, slyktuokuo – speiteiba! 🙂 Atkareiga nu kopeja, nu mīlesteibys iz dzeivi, nu gribiešonys īsavuiceit kūnaviņ jaunu, nu gribiešonys augt, pošizagleituot i atsateistēt. Interesej vyss i piec īspiejis leluokus devuos. Maksimaliste. Eipaši aizraun dejis, psihologiska rakstura šausmu kinys, žurnalistika (sovus spākus raugu i rūku raksteišonā īvyngrynu DU studentu žurnalā “Lai Top!”), cytu kulturu izzynuošona, skaiteišona, biblioteku apmekliejumi i jaunu skaitamgobolu īguode. Piedejuo laika atkluojums i aizaraušona – skrytuļuošona. Caru kodnaviņ īsavuiceit kuopšonu klintīs, dastruoduot par pingvinu cāluoju i apceļuot vysys pasauļa vaļstis.

Paguojs jau krītnys laika spreids kai nūsaslēdze muns četru mienešu ilgais dzeivis pūsmys vīnā nu skaistuokojom Pūlejis piļsātom – Krakovā. Krakova – muna ERASMUS* laika piļsāta, kruošņuokū pīdzeivuojumu i naaizmierstamuokū nūtikšonu piļsāta! Piļsāta, kurā gribīs atsagrīzt, kurā atstuoju daļu sovys sirds, piļsāta, kuru es īmīļuoju! Nui, tik skali!

Munu ERASMUS pīdzeivuojumu aizsuokumi meklejami dzestrā 16.febraļa reitā, kod tyka muotys ardīvys Latvejai i aizsuokts ceļš pretim sirdī sen auklātajam sapynam – studejom uorvaļstīs! Juoatzeist, ka jau seņ kluseibā beju ceriejus, ka  kaidu dīnu sovys zynuošonys i pīredzi variešu vairuot kaidā prestižā uorvaļstu universitatē, ka variešu klauseitīs i kasdīnā komunicēt ar pasaulī atzeitim profesorim, kuru vīdūklī īsaklausa i jam vārā, kuru gruomotys skaita i atzeist. Vysod ir gribiejīs byut kluot zynuotnis augstuokajim plauktim, byut sūpluok lelajai zynuotnei…

Itūreiz sūli pretim sapynam paleidzēja spert taišni ERASMUS programma, pasasokūt kurai maņ beja vareiba studēt Jagielonejis Universitatē (Jagiellonian University) Krakovā pi patīsi profesionalim i zynūšim pasnīdziejim. Studejis itamā universitatē vierteju kai naatsveramu pīredzi, kas deve ari zynomu ryudejuma devu – studēt cytā vaļstī, apmāram nedelis laikā īlēkt cytys vaļsts i cytys universitatis izgleiteibys sistemā, apgiut studeju vīlu NAdzymtajā volūdā (munā gadejumā angļu, krīvu i poļaku volūdā), kai ari paspēt tū vysu apvīnuot ar nasaskaitomim pasuokumim, kas veļteiti i organizāti par gūdu studentim, nav nimoz tik vīgli. Prūtams, varit saceit, ka kulturys pasuokumu apmekliešona nimoz nabeja obligata, tak es jau pyrms braucīņa beju izvirzejuse sev mierki – piec īspiejis vairuok redzēt, piec īspiejis vairuok izbaudeit i piec īspiejis vairuok īsavuiceit!

Taipat kai kotram, kurs dūdās iz uorvaļstim voi nu ERASMUS voi kaidys cytys programmys ītvorūs, voi vīnkuorši atpyutys braucīnī, es īteiktu jau suokumā deļ seve saprast, kaids ir Jiusu golvonais mierkis – studejis, dorbs, atpyuta i laiska zviļniešona pludmalē, cytys kulturys izzynuošona, volūdys apgiušona itt. Ticit maņ, tys paleidzēs gon plānuot sovu laiku, gon ari daudz lītdereiguok izlītuot jū.

Par sevi varu saceit vīnu – es gribieju vysu i tai pavairuok, deļ tam daguoja riekinuotīs gon ar nagulātom naktim, gon saspryngtu dīnys ritmu, gon namiteigu laika napīteikameibys sajiutu, kū spylgtai raksturoj ari kaids īroksts portala draugiem.lv dīnysgruomotā: “Munai dīnai vajadzeigys papyldu stuņdis – kai minimums sešys + kaida stuņde, kū beidzūt veļteit mīgam… Varbyut Tev ir kaida līka, kū aizdūt maņ – ar sovom napīteik… [23:15, 28.marts, 2012]” I tai četru mienešu garumā!

Raksturojūt emocejis, kurys puorjēme pyrms braucīņa uzsuokšonys, pruotā nuok tikai vīns – piļneiga sirrealisma sajiuta! Naspieju nūticēt, ka patīsi dūdūs studēt iz cytu vaļsti, iz cytu universitati, deļ tam, dūmojams, arī cyta veida stress i uztraukums mani napīmeklēja. Es vīnkuorši naspieju nūticēt, ka vyss, kas nūteik, ir eistineiba i nūteik ar mani. Ari niu, rokstūt ituos ryndys, naspieju apjaust, ka vēļ pavysam naseņ beju tuoli pa celi nu sātys, svešā vaļstī. Tei ari ir rakstureiguokuo ERASMUS laika sajiuta – sirrealisma sajiuta, kas napamat ni iz seikšaļteni.

Pīdzeivuots ir bezgola daudz, i nav vīgli vysys emocejis i vysu pīradzātū izstuosteit. Bet tys ari nav muns pošmierkis. Tuo vītā, lai skaiteitu nasaskaitomys lopys ar munom dūmom i izjiutom, aicynoju Tevi, skaiteituoj, atvērt munu biļžu albumu, īsavērt tymā i reizē ar mani izdzeivuot ERASMUS laiku Pūlejā, izstaiguot Vīnis skaistuokuos vītys i ļautīs golvu reibynūšai mīlesteibai Boltkrīvejis golvyspiļsātā Minskā!
Dzeivojūt svešā vaļstī, izastruoduoja daži padūmi, kuri, pa munam, byutum juojam vārā sevkuram, kurš ir nūliems dūtīs kaidā nu apmainis programmom. Nūliemu pasadaleit!

Padūms Nr. 1 – nūryudej nervus!

Dasasokūt ERASMUS programmai i aizsuocūt daleibu tamā, juobyut gotovam iz vysu, ari iz pamateigu nervu patiereņu, ar kū daīt sasaskart jau dokumentu kuortuošonys stadejā! Dūmoju sevkurs ERASMUSīts saprūt, par kū es runoju – nasaskaitomi paroksti, papeiru kaudzis, viestulis, studeju grafiku saskaņuošona, ceļuojuma plānuošona, bilešu īguode itt.

Tū, ka turpmuokūs mienešus muna dzeive naritēs īprīškejā īrostajā ritmā i tai, kai tū gribātum es, saprotu jau pyrmajā dīnā, kod vēļ pat nabeju tykus sovā jaunajā mītnis zemē – Reigys autoūsta sareikuoja myusim sovys guņskrystobys! Myusu izvālātais ECOLINES firmys autobuss kavēja iz nanūteiktu laiku, bez kaidim breidynuojumim i paskaidruojumim. Tuo vītā tikai naziņa i nervoza meiņuošonuos pa autoūstys platformu bailēs nūkavēt autobusa daīšonys breidi.

Niu, kod aiz mugurys tik daudz pīdzeivuojumu i puorbaudejumu, itys taids nīks viņ ruodīs, bet skaitūt sovys ERASMUS pīzeimis, saprūtu, ka tūlaik sajiutys beja cytys: “Reigys autoūstā planavuotuos stuņdis vītā dasaīt pavadeit vasalys treis, jū, redz, autobuss nadaudz kavēsīs, kai nūruoda autoūstys darbinīki piec tam, kod 40 minotys asam pavadejuši uorā, skatīņus veļtejū kotram garum braucūšam Ecolines autobusam, cereibā, ka tys byus myusejais. Itys! Nu, itys nūteikti byus myusu! – tai garum pabrauc naskaitamu firmu autobusi. Pa itū laiku skaļruņūs vairuokys reizi atskaņ – pienāk autobuss Tallina – Rīga, sākas iekāpšana autobusā Rīga – Tallina. Nu, i kurš saceja, ka igauni ir lieneigi?!”

Vylšonuos naaprokstama! Na tik daudz pošā faktā, ka teik izjaukts myusu saplānuotais grafiks (tys, saprūtama līta, ari!), cik attīksmē pret pasažīrim, jo vysā gaideišonys laikā naatskanēja NIVĪNS paziņuojums voi breidynuojums, ka autobuss kavēsīs, līkūt naivi cerēt, ka autobuss kuru kotru beidi byus kluot. Tikai itys breids suokumā puoraug 40 minotuos, kū pavodom uorā, tod stuņdē, tod vēļ pusstuņdē. Turkluot piec 15 minotom kūpš breiža, kod kuortejū reizi asam nūskaidruojuši, ka autobuss byus piec 30 minotom, divejim kolēgim atīt sms, ka autobuss kavēsīs i byus piec 40 minotom. Lobs! Es sovu breidynuojuma sms gaidu vēļ aizviņ! Dūmojams, ka lela daļa ceļuojuma bīdru ari!

Kod beidzūt asam ījāmuši sovys vītys autobusā i aizsuokam ceļu, stjuarte mikrofonā izmat viņ dažus atsavainuošonys vuordus par kaviešonūs, tai arī nanūruodūt īmeslu, deļ kuo tys ir nūtics (nui, cyta storpā, tū myusim navarēja paskaidruot ari autoūstā!), tuo vītā aizsuocūt garumgarū penteri par tū, kū dreikst i kū nadreikst dareit autobusa atejā! Bet vysvaira mani sajiusmynuoja frāze – cienījamie pasažieri, pieturvietās uzturēsimies 5 minūtes. Lūgums to ievērot un autobusā ierasties savlaicīgi, lai nekavētu autobusa kustības grafiku! Kurs nu tū byutum sacejs! [fragments nu autoris ERASMUS pīzeimem].”
Itaidu nastandarta situaceju beja cīš daudz, kod tu saprūti, ka vyss, kū tu tik ryupeigai esi plānuojs, var izjukt vīnā acumirklī! I zinit – labi viņ ir! Piec itim četrim mienešim, ruodīs, nikas vairs naspiej puorsteigt i izsist nu leidzsvora, jo vysod golvā teik puordūmuoti naskaitami cyti varianti i maklātys alternativys!

Padūms Nr. 2 – maksimali izmontoj orientiešonuos nedeli!

Īsarūnūt svešā vaļstī, ERASMUS studentim parosti teik dūta tai saucamuo orientiešonuos nedeļa, kurys laikā aprast ar situaceju. Orientiešonuos nedeļa, kas pīpiļdeita gon ar kulturys pasuokumim, gon naformalom sasatikšonys reizem, gon ari teiri formalom padareišonom, golvonūkuort ir paradzāta tam, kab mes, jaunī ERASMUSīši, aprostu ar jaunū, myusim svešū vidi, īsavuiceitu orientētīs na tikai universitatis i tuos naskaitamūs kuormu labirintūs, bet ari pošā piļsātā, kai ari lai aprostu ar multikulturalū vidi myusim apleik. I patīsi, Krakovā vaļdeja naīdūmojams kulturu kokteiļs – spāni, itāli, igauni, lītovīši, singapūrīši, japani, turki, krīvi, ukraini, boltkrīvi, norvēgi, moldāvi, rumāni, kīnīši i daudzu, daudzu cytu vaļstu puorstuovi.

Lels beja muns puorsteigums na tik par tū, cik daudzu kulturu puorstuovus saista studejis taišni Pūlejā, bet ari tys, cik harmoniski i ciļvieceigi vysys ituos kulturys spiej sadzeivuot na tikai universitatis i kūpmeitņu āku ītvorūs, bet ari piļsātā kūpumā. Juoatsazeist, ka da šam munā uztverē beja veiduojīs dīzgon nagativs Pūlejis tāls, jo nareši daguo dzierdēt nagativus i osus izteicīņus, kas vārsti ituos vaļsts vierzīnī, pīvadumam, ka Pūleja ir kai malnais caurums Eiropys kartē, respektivi, lela i plaša vaļsts, tak tur nav, kū redzēt, i nav, kū dareit. Tak realuo situaceja vaļstī mani puorsteidze. Pozitivā ziņā! Jau pyrmī sūli jaunajā vaļstī i pyrmī īspaidi lyka acumirklī atsasaceit nu vysim stereotipim i īprīšk dzierdātajim nūstuostim, ite ari saprotu – nikod nasprīd par vaļsti, cikom naesi tymā bejs i jū redziejs!

Juoatzeist, itei nedeļa paskrēja namonūt – minimums iz nedeļu beja juoaizmierst taidi vuordi kai mīgs, nūgurums, nagribu, navaru! Tuo vītā dereigai beja īgaumēt – īšu, dareišu, pījimšu izaicynuojumus i nūviertiešu maņ snīgtuos īspiejis! Turkluot itei nedeļa beja breineiga īspieja dybynuot jaunus kontaktus i īgiut jaunus draugus vysuos pasauļa moluos. Es pat atsaļaušu apgolvuot, ka itei nedeļa ir vīna nu svareiguokajom ERASMUS studenta dzeivē.

*ERASMUS – augstuokuos izgleiteibys studentu apmainis programma, kas dūd īspieju iz nūteiktu laiku dūtīs studēt voi izīt praksi cytā Eiropys vaļstī.

Turpynuojums byus cytā dīna…

Agnese, DU studente

Kartenis – nu Agnesis privatuo arhiva, pīdzeivuojumi ERASMUS laikā